Ministri i Mbrojtjes Armend Mehaj ka njoftuar se numri i ushtarakëve të FSK-së të trajnuar vetëm gjatë këtij viti ka arritur në 2547.
“Avancimi profesional i pjesëtarëve të Ushtrisë së Republikës së Kosovës përbën njërin ndër synimet më të rëndësishme të ministrisë së mbrojtjes, andaj përgjatë këtyre 19 muajve është investuar maksimalisht në financimin e trajnimeve të ushtarakëve tanë përkrah ushtrive të shteteve më të fuqishme aleate”, ka shkruar Mehaj në një postim në rrjetin social Facebook.
Përmes bashkëpunimit me partnerët strategjik, ai ka thënë se në fushën e trajnimeve, po ngriten në vazhdimësi kapacitetet profesionale dhe operacionale, sic është shprehur ai “në funksion të misionit tonë kushtetues, gjithmonë në shërbim të paqes, stabilitetit dhe sigurisë së shtetit të Republikës së Kosovës, e përtej kësaj ky bashkëpunim në avancimin profesional të ushtarakëve kontribuon në përmbushjen e vizionit për anëtarësim në NATO”.
Mehaj tha se investimi i vazhdueshëm në FSK është garancion për ushtri që i shërben ruajtjes së paqes në vend, rajon dhe më gjerë.
