Presidentja e Kosovës Vjosa Osmani, e ka përkujtuar Xhemajl Mustafën, veprimtarin e LDK-së dhe një nga bashkëpunëtorët më të afërt të ish-presidentit Ibrahim Rugova, në 25 vjetorin e vrasjes.
Osmani e vlerësoi lart kontributin e Mustafës, për të cilin tha se ishte një nga zërat më të artikuluar për liri dhe pavarësi.
“Në këtë përvjetor kujtojmë me nderim Xhemail Mustafën, një nga zërat më të artikuluar të lirisë, intelektualin që me penë, guxim e vizion mbrojti idealin e Kosovës së pavarur. Ai ishte bashkëpunëtori i palëkundur i Presidentit historik, dr. Ibrahim Rugova, dhe një prej arkitektëve të mendimit politik që na çoi drejt shtetit që kemi sot. Por, plagët e së kaluarës nuk mbyllen pa drejtësi”, tha Osmani.
E para e shtetit ka kërkuar zbardhjen e vrasjes, për çka theksoi se është detyrim i Republikës.
“Zbardhja e kësaj vrasjeje politike nuk është vetëm kërkesë morale, por detyrim i Republikës. Lavdi jetës, veprës dhe sakrificës së Xhemail Mustafës!”.
