Gjykata Themelore në Prishtinë ka shpallur aktgjykim ndaj 12 të akuzuarve në rastin “Subvencionet 1”. 11 prej tyre, Gjykata i dënoi me burgim efektiv prej 31 vitesh, 171 mijë euro gjobë dhe 6 vite burgim me kusht (së bashku). Kurse, një i akuzuar u lirua nga të gjitha akuzat.
Aktgjykimi u shpall të enjten nga kryetari i trupit gjykues, Kujtim Krasniqi.
Të akuzuarit: Luan Statovci, Sadat Shkodra, Salih Statovci, Berat Nika, Hasan Maxharraj, Kushtrim Zogaj, Jeton Sylaj, Lulzim Hajdaraj, Musa Nivokazi, Almir Abdurrahmani, Afrim Abazaj dhe Florim Nimanaj, ngarkoheshin me veprat penale “Marrje ryshfeti”, “Keqpërdorim i detyrës apo autoritetit zyrtar”, “Mashtrim me subvencione”, e të tjera.
Sipas aktgjykimit, Luan Statovci u shpall fajtor për “Marrje ryshfeti” në bashkëkryerje dhe në vazhdimësi, dhe u dënua me 8 vite burgim dhe 50 mijë euro gjobë.
Sadat Shkodra u shpall fajtor për “Marrje ryshfeti” në bashkëkryerje dhe në vazhdimësi, dhe u dënua me 6 vite burgim dhe 20 mijë euro gjobë.
Berat Nika u shpall fajtor për “Marrje ryshfeti” në bashkëkryerje dhe në vazhdimësi, dhe u dënua me 6 vite burgim dhe 20 mijë euro gjobë.
Kushtrim Zogaj u shpall fajtor për “Marrje ryshfeti” dhe u dënua me 3 vite burgim dhe 5 mijë euro gjobë.
Hasan Maxharraj u shpall fajtor për “Mashtrim me subvencione” dhe u dënua me 3 vite burgim.
Musa Nivokazi u shpall fajtor për “Mashtrim në detyrë”- vepër e kryer në bashkëkryerje dhe u dënua me 2 vite burgim, i cili nuk do të ekzekutohet nëse i akuzuari në afat prej tri vitesh nuk kryen vepër të re penale. Të njëjtit i shqiptohet edhe dënim me gjobë në shumën prej 10 mijë euro.
Lulzim Hajdaraj u shpall fajtor për “Mashtrim në detyrë”- vepër e kryer në bashkëkryerje, dhe u dënua me 2 vite burgim, i cili nuk do të ekzekutohet nëse i akuzuari në afat prej tri vitesh nuk kryen vepër tjetër penale. Hajdarajt iu shqiptua edhe dënim me gjobë në shumën prej 10 mijë euro.
Salih Statovci u shpall fajtor për ndihmë në “Marrje të ryshfetit” dhe u dënua me 5 vite burgim dhe 25 mijë euro gjobë.
Almir Abdurrahmani u shpall fajtor për “Falsifikim të dokumenteve” dhe u dënua me 25 mijë euro gjobë.
Florim Nimanaj u shpall fajtor për “Dhënie ryshfeti” dhe u dënua me 1 vit burgim, i cili nuk do të ekzekutohet nëse i akuzuari në afat verifikimi prej dy viteve nuk kryen vepër të re penale. Ai u dënua edhe me 3 mijë euro gjobë.
Afrim Abazaj u shpall fajtor për “Ndihmë në dhënie të ryshfetit” dhe u dënua me 1 vit burgim, i cili nuk do të ekzekutohet nëse nuk kryen vepër tjetër penale në afat prej dy viteve. Si dhe u dënua me 3 mijë euro gjobë.
Të akuzuarve Luan Statovci dhe Sadat Shkodra, Gjykata iu shqiptoi dënim plotësues- ndalimi i ushtrimit të funksionit publik në administratë publike ose shërbim publik në afat prej 10 viteve. Kurse, Kushtrim Zogajt, Berat Nikajt, Musa Nivokazit dhe Lulzim Hajdarajt, dënim plotësues- ndalimi i ushtrimit të funksionit publik në administratë publike ose shërbim publik në afat prej 5 viteve.
Kurse, të akuzuarit: Jeton Sylaj për “Keqpërdorim të detyrës zyrtare”, Hasan Maxharraj për “Keqpërdorim të detyrës zyrtare” dhe Salih Statovci për “Mashtrim në bashkëkryerje” dhe në vazhdimësi, lirohen nga akuzat pasi nuk është provuar se kanë kryer këtë vepër penale.
Në dënimin me burgim, të akuzuarve iu llogaritet edhe koha e kaluar në paraburgim.
Kurse, nëse të akuzuarit nuk mund ta paguajnë dënimin me gjobë, i njëjti iu zëvendësohet me burgim, ku 20 euro gjobë llogariten për një ditë.
Të akuzuarit obligohen që në emër të shpenzimeve të procedurës penale të paguajnë secili vec e vec nga 300 euro, kurse në emër të fondit të kompensimit të viktimave të krimit nga 100 euro.
Gjykata urdhëroi konfisikimin në mënyrë të përhershme të sendeve të përfituara me vepër penale dhe që janë përdorë për kryerjen e veprës penale. Nga i akuzuari Salih Statovci konfiskohet shuma prej 200 mijë euro dhe një telefon, nga i akuzuari Berat Nika dy telefona, nga Sadat Shodra një telefon.
Urdhërohet kthimi i veturës në emër të A.M., të akuzuarit Maxharraj dy telefona Samsung, Kushtrim Zogajt një telefon.
Pala e dëmtuar- Ministria e Bujqësisë për realizimin e kërkesës pasurore-juridike udhëzohet në kontest të rregullt juridiko-civil.
Kundër këtij aktgjykimi, lejohet ankesa në afat prej 30 ditësh në Gjykatën e Apelit.
Në shkurt të 2022-ës, PSRK kishte ngritur aktakuzë ndaj 21 të pandehurve, në rastin “Subvencionet 1”, të cilët janë: Luan Statovci, Sadat Shkodra, Salih Statovci, Berat Nika, Hasan Maxharraj, Kushtrim Zogaj, Habibe Dauti, Alban Bushati, Jeton Sylaj, Lulzim Hajdaraj, Musa Nivokazi, Almir Abdurrahmani, Salih Kelmendi, Bekim Shala, Fuat Morina, Dukagjin Mavraj, Flamur Zeqiri, Daut Kabashi, Kastriot Berisha, Afrim Abazaj dhe Florim Nimanaj.
Ndryshe, në seancën e 21 shkurtit 2023, trupi gjykues kishte veçuar procedurën për të akuzuarit Nivokazi dhe Kelmendi, duke shtuar se gjykata në seancës e radhës do të vlerësojë nëse procedura do të vazhdohet ndaras apo do të bashkohet.
Ndërkaq, në seancën e 14 prillit 2023, ishte bashkuar procedura penale ndaj të akuzuarit Nivokazi me të akuzuarit e tjerë.
Në seancën e 13 prillit 2022, Gjykata Themelore në Prishtinë, kishte pranuar marrëveshjen për pranimin e fajësisë për 7 nga 21 të akuzuarit në rastin “Subvencionet 1”.
Ndërsa, më 19 prill 2022 Gjykata Themelore në Prishtinë kishte shpallur aktgjykim dënues ndaj shtatë të akuzuarve në rastin “Subvencionet 1”, Alban Bushati, Kastriot Berisha, Bekim Shala, Flamur Zeqiri, Habibe Dauti, Dukagjin Mavraj dhe Daut Kabashi, duke i dënuar me 6 vite e 1 muaj burgim dhe 2 mijë euro gjobë.
Sipas aktakuzës së ndryshuar të PSRK-së, të 4 prillit 2022, Flamur Zeqiri, Bekim Shala, Kastriot Berisha dhe Dukagjin Mavraj, akuzoheshin për veprën penale mashtrim me subvencione, për keqpërdorim të pozitës apo autoritetit zyrtar akuzohej Habibe Dauti, për marrje ryshfeti dhe falsifikim të dokumenteve akuzohej Alban Bushati, ndërsa për dhënie ryshfeti akuzohej Daut Kabashi. /Betimi për Drejtësi
