Grabitjet e vjedhjet nëpër shtëpi e banesa përveç që po sjellin humbje të mëdha, po shkaktojnë edhe pasiguri e ankth te qytetarët. Ka plot raste kur viktimat hasin në hajnat që kanë hyrë brenda shtëpive, duke u ballafaquar kështu direkt me rrezikun, raporton Gazeta Sinjali.
Një rast i tillë dhe mjaft i rëndë ka ndodhur mbrëmë pas mesnate në fshatin Gracka e Vjetër në Lipjan, ku dy persona ende të paidentifikuar kanë hyrë për të kryer grabitje në një shtëpi.
Burimet e Gazetës Sinjali kanë bërë me dije se brenda shtëpisë ndodhej një burrë 49-vjeçar, që u përball direkt me hajnat e maskuar, të cilët arritën të futen brenda.
Bazuar në informacionet e para, dy të dyshuarit e kanë lidhur dhe i kanë kërkuar para, e më pas e kanë gjetur një shumë të të hollave prej mbi 2 mijë euro dhe janë zhdukur.
Me t’u denoncuar rasti, njësitë policore kanë dalë në vendin e ngjarjes për të kryer ekzaminimet e nevojshme që ndihmojnë në zbardhjen e rrethanave të rastit.
Prokurori i Shtetit ka urdhëruar që rasti të cilësohet ‘Grabitje’, ndërsa veprimet tjera do merren posa të identifikohen dhe të kapen të dyshuarit.
