Ndonësë para pak ditësh u raportua se janë vajzat ato që kryesojnë në universitete të Kosovës, në vitin 2022/23, 586 vajza nuk u regjistruan në klasën e 10-të.
Edona Kutleshi – Maliqaj, këshilltare për media në ministrinë e Arsimit, Shkencës, Teknologjisë dhe Inovacionit (MAShTI), një një intervistë për Grazeta, ka krahasuar këto shifra me vitin paraprak 2021.
“Sipas të dhënave të raportuara në Sistemin e Menaxhimit të Informatave në Arsim, në vitin shkollor 2021/22 i kishim 11739 vajza në klasën e 9-të në arsimin publik dhe privat, ndërkaq në vitin vijues 2022/23 i kemi 11153 vajza të regjistruara në klasën e 10-të të arsimit të mesëm të lartë. I bie 586 më pak.”
Tutje, Kutleshi-Maliqaj, ka shtuar se ndër arsyet e kësaj dukurie është edhe migrimi.
“Prej tyre janë të raportuara 39 që kanë dalë jashtë vendit dhe 6 vajza që kanë braktisë shkollimin në klasën e 9 dhe për 541 vajza që pasi e kanë mbaruar klasën e 9 nuk dihet nëse kanë migruar apo nuk kanë dashur të regjistrohen në klasën e dhjetë, sepse kjo e dhënë nuk raportohet në MASHTI”, thotë ajo.
Së fundmi nga Agjencia e Statistikave të Kosovës u raportua se 58,2% femra ndjekin arsimin e lartë në nivelin Bachelor.
