Jo vetëm në Brezovicë, e Rugovë, por ndërtimi i villave jashtëligjshëm është bërë edhe në fshatin Orllan të Podujevës, e rreth liqenit të Batllavës.
Burime të portalit FrontOnline, brenda komunës kanë bërë të ditur se 5 ndërtime pa leje do të rrënohen ditën e hënë.
“Të hënë në Batllavë do të rrënohen pesë ndërtime pa leje” tha shkurt ky burim.
Ndërsa në këtë pjesë jashtëligjshëm janë ndërtuar 59 vila, nga disa persona.
Këtë e kanë bërë të ditur nga Komuna e Podujevës për FrontOnline.
“Në Batllavë ka villa të ndërtuara me dhe pa leje, shifra e saktë e ndërtimeve pa leje në zonën e Orllanit e konstatuar nga Inspektorati i Ndërtimit është 59”, thuhet në përgjigjen e Komunës.
Të pyetur se çfarë do të ndodhë me vilat e ndërtuara jashtëligjshëm, nga Komuna thonë se do të veproj në përputhje me ligjin.
“ Inspektorati i ndërtimit do të veproj në përputhje me ligjin, në kuadër të detyrave dhe përgjegjësive të saj. Për veprimet e mëtutjeshme do të njoftoheni me kohë”, bëjnë të ditur nga Komuna.
Por në një raport të Inspektoratit të Komunës të muajit shkurt të cilin e ka siguruar portali FrontOnline, thuhet se inspektorati ka identifikuar 39 vila pa leje në këtë pjesë.
Sipas raportit vilat kanë qenë në faza të ndryshme nga vënia e themelit e deri në fazën e përfundimit të ndërtimit.
Në raportin e siguruar nga FrontOnline, thuhet se një investitorë i cili i ka ndërtuar katër vila nuk ka aplikuar ende për leje të ndërtimit. Ndërsa 10 investitorë të cilët janë pronar të 29 vilave kanë aplikuar për leje.
Ndërsa një restoranti i cili posedon dy villa është pajisur me leje të ndërtimit.
