Kur jemi afruar 21 Nëntorit, ku me vendim të Qeverisë së Kosovës për targat ilegale serbe, për dy muaj do të jetë masa e gjobitjes, nga Lëvizja Vetëvendosje thonë se nuk do të ketë kthim prapa dhe do të vazhdojnë të shtrijnë sovranitetin në vend.
Deputeti i Lëvizjes Vetëvendosje, njëherësh anëtar i Komisionit Parlamentar për Siguri dhe Mbrojtje, Mefail Bajqinovci, theksoi se reagime për vendimet e Qeverisë Kurti ka pasur edhe në të kaluarën, por kryeministri është i vendosur që të vazhdojë të shtrijë sovranitetin në Republikën e Kosovës.
“Nuk është vendimi i parë i Qeverisë së Kosovës që ka pasur reagime nga SHBA-ja dhe QUINT-i. Kemi pasur reagim të QUINT-it për rastin e zgjedhjeve, referendumit, edhe për rastin e dokumentacionit kur u bë bllokada e rrugës në Mitrovicën e Veriut. Kemi pasur edhe deklaratat e shteteve mike që kanë thënë se Kosova është vend sovran dhe ka të drejtë të marr vendime për vete.
Pra, qëndrimet karshi Serbisë për mos kompromise të dhimbshme nuk janë qëndrime anti-amerikane. Vendimet e Qeverisë së Kosovës janë sovrane dhe do të vazhdojmë t’i zbatojmë ato, pavarësisht reagimeve”, ka thënë Bajqinovci, për Radio Dukagjini.
Me vendimin e Qeverisë së Kosovës për targat ilegale serbe, nga 21 nëntori, për dy muaj deri më 21 janar do të jetë masa e gjobitjes dhe më pas nga 21 janari do të jenë targat provuese për dy muaj të tjerë, pas së cilës datë, më 21 prill do të lejohen vetëm targat RKS në territorin e Republikës së Kosovës.
