Gjykata Themelore në Prishtinë ka shtyrë ekzekutimin e vendimit të Ministrisë së Drejtësisë për suspendimin e Ilir Mulhaxhës si Përmbarues i Telekomit.
Ky vendim u mor pas ankesës në Gjykatë të avokatit të Mulhaxhës, Fisnik Sogojeva, për ta shtyrë ekzekutimin e vendimit, shkruan Gazeta Online Reporteri.net
Padinë kundër Ministrisë së Drejtësisë, Sogojeva e kishte parashtruar më 8 dhjetor, derisa kërkesa i është aprovuar katër ditë më vonë, më 12 dhjetor.
Ky i fundit, vendimin për suspendim të Mulhaxhës e quajti veprim të ngutshëm dhe pa asnjë bazë ligjore.
“Veprimit të ngutshëm pa asnjë bazë ligjore të Ministrisë së Drejtësisë, për të suspenduar Përmbaruesin Privat – Ilir Mulhaxha, pas paraqitjes së kërkesës dhe padisë nga ne si përfaqësues të autorizuar në gjykatë që të shtyjë ekzekutimin e vendimit, kjo e fundit dha vendimin e saj”, shkroi avokati Fisnik Sogojeva në Facebook.
Vendimin për shtyrje, Gjykata Themelore në Prishtinë e mori bazuar në Ligjin për Konfliktet Administrative, i cili përcakton se me kërkesë të paditësit ndaj ekzekutuesit të vendimit, në këtë rast Gjykatës, vendimi për ekzekutim mund të shtyhet deri në vendim definitiv gjyqësor.
Oda e Përmbaruesve Privat të Kosovës kanë thënë se vendimin për suspendim të Mulhaxhës, e ka nënshkruar Zëvendësministri i Drejtësisë, Blerim Sallahu, në emër të Ministres Albulena Haxhiu.
Në reagim, theksohet se Ministrisë së Drejtësisë nuk i takon të marrë vendime të tilla, gjykuar nga fakti se kjo i takon Komisionit Disiplinor të MD’së.
“Oda e Përmbaruesve konsideron se vendimi në fjalë është i paligjshëm, i ngutshëm, i padobishëm. Ministria e Drejtësisë nuk ka kompetencë të nxjerrë vendime të tilla, përderisa ato nuk rekomandohen nga Komisioni Disiplinor”, thuhet në reagimin e tyre. /Reporteri.net/.
