Punonjësit shëndetësorë në shumë raste janë denoncuar për trajtim të pandërgjegjshëm mjekësor, duke u akuzuar nga pacientët për mos ofrime të shërbimeve të nevojshme si në institucione publike ashtu edhe private. Veprimet të tilla përbëjnë vepër penale dhe sanksionohen me Kodin Penal të Republikës së Kosovës, raporton Gazeta Sinjali.
Për një rast të tillë që dyshohet se ka ndodhur gjatë ditës së djeshme në fshatin Magurë të Lipjanit, Prokuroria ka nisur hetimet.
Burimet e Gazetës Sinjali brenda Prokurorisë kanë bërë me dije se e gjithë ngjarja dyshohet të ketë ndodhur në Qendrën e Mjekësisë Familjare në Magurë, ku një grua e komuniteti ashkali kishte shkuar të kërkojë ndihmë mjekësore në repartin e Stomatologjisë.
Por aty përpos që s’kishte marrë shërbimin mjekësor për të cilin shkoi, mjeku i këtij reparti, F.Sh., dyshohet se ka ofenduar dhe ka folur me tone të larta në drejtim të pacientes, të cilën e ka dëbuar nga ordinanca.
Përballë kësaj situate, 39-vjeçarja ka denoncuar rastin në Polici, ku para hetuesve policorë ka rrëfyer në detaje ngjarjen se si ka ndodhur.
Me urdhër të prokurorit, rasti është iniciuar ‘Trajtim i pandërgjegjshëm mjekësor’ dhe ka rekomanduar që rasti të procedohet në procedurë të rregullt.
Gazeta Sinjali ka provuar që të marrë një prononcim edhe nga mjeku i dyshuar në këtë rast, mirëpo i njëjti nuk ka kthyer përgjigje deri në publikimin e artikullit.
Po ashtu Sinjali ka kontaktuar edhe me drejtorin për Shëndetësi dhe Përkujdesje Sociale në Komunën e Lipjanit, Shkëlzen Hajdini, i cili ka thënë se nuk është dijeni lidhur me rastin dhe do të deklarohet pasi të marrë informacione për atë se çfarë ka ndodhur.
Por Hajdini nuk është përgjigjur më në telefonatat e Sinjalit, për të marrë nga ai një deklaratë zyrtare.
Sinjali do t’iu mbajë të informuar me detajet e reja lidhur me rastin.
