Gjykata e Apelit ka ndryshuar aktgjykimin e shkallës së parë duke e liruar nga akuza për konflikt interesi ish-kryetarin e Komunës së Klinës, Zenun Elezaj.
Sipas njoftimit, me aktgjykimin e Gjykatës Themelore në Pejë Elezaj ishte shpallur fajtor për shkak të veprës penale “Konflikt interesi” duke u gjykuar me dënim me gjobë në shumë prej 4000 euro.
“Gjykata e Apelit – Departamenti për Krime të Rënda me aktgjykimin PAKR.nr.70/2022 të datës 12.04.2022, ka marrë aktgjykim lirues ndaj të akuzuarit Z.E., me arsyetim se veprimet e të akuzuarit nuk është provuar se janë konsumuar elementet e veprës penale, marrë për bazë faktin se themelimi i komisionit rekrutues nuk kishte krijuar konflikt interesi, duke qenë se konflikti i interesit duhet shqyrtuar rast pas rasti, dhe se benefiti financiar rezulton se është krijuar kur është lidhur kontrata dhe jo momenti i themelimit të komisionit rekrutues për të cilin veprim ngarkohej i akuzuari”, thuhet në njoftim.
