Presidenti i SHBA-së, Joe Biden ka nënshkruar projektligjin e buxhetit prej 1.7 trilion dollarësh për vitin fiskal 2023.
Projektligji i buxhetit, i cili do t’i sigurojë financim qeverisë federale amerikane deri më 30 shtator 2023, kur përfundon viti fiskal 2023, iu dërgua për nënshkrim presidentit Biden pasi u miratua në Senat dhe në Dhomën e Përfaqësuesve të SHBA-së.
Në një deklaratë nga Shtëpia e Bardhë bëhet e ditur se projektligji në fjalë është nënshkruar nga presidenti Biden.
Biden në llogarinë e tij në Twitter njoftoi se nënshkroi projektligjin e buxhetit që mori mbështetjen e të dyja palëve. “Një vit historik i përparimit po përfundon”, shkroi ai.
Duke theksuar se buxheti parashikon investime në kërkimin mjekësor, sigurinë, shërbimet shëndetësore të veteranëve, rimëkëmbjen nga fatkeqësitë dhe fondet e ligjit për dhunën kundër grave, Biden tha se buxheti do të sigurojë mbështetje të konsiderueshme për Ukrainën.
“Ne presim më shumë në vitin 2023”, tha presidenti amerikan.
- Ndihma për Ukrainën
Paketa e buxhetit, e cila u dakordua pas disa muajsh negociata, përfshinë shpenzime jo mbrojtëse prej 772.5 miliardë dollarësh dhe financim të mbrojtjes prej 858 miliardë dollarësh.
Projektligji i buxhetit përfshin 45 miliardë dollarë ndihmë ushtarake, humanitare dhe ekonomike për Ukrainën.
Rregullorja për ndalimin e punonjësve të qeverisë federale që të shkarkojnë aplikacionin, TikTok në pajisjet shtetërore është në projektligjin e buxhetit.
Projektligji cakton rreth 40 miliardë dollarë burime për të ndihmuar komunitetet në të gjithë vendin që të rikuperohen nga fatkeqësitë natyrore si thatësirat, uraganet, përmbytjet dhe zjarret.
