Kërkesa e ministrit Sveçla që kosovarët të lejohen me pasaporta të skaduara nuk dihet si mund të jetë marrë nga Gjermania, por në Kosovë nxiti reagime masive ndaj ministrisë që la kosovarët pa atë dokument, prej shtatorit.
Në pamundësi për të siguruar material për prodhimin e pasaportave, pas disa muajsh mungesë, ministri i Brendshëm, Xhelal Sveçla, i ka bërë një kërkesë të pazakontë Gjermanisë. I kërkoi që t’i lejojë shtetasit kosovarë, që kanë lejeqendrim atje, të hyjnë me pasaporta të skaduar.
Sveçla e niste letrën me arsyetimin se njëherë pandemia, e pastaj lufta në Ukrainë e ka penguar Kosovën që të furnizohet me material për dokumente.
Agim Veliu i LDK-së, ish-ministër i Punëve të Brendshme tallet me arsyet që i ka dhënë pasardhësi i tij për mungesën e materialit për pasaportë.
“Do të ishte e justifikueshme po të ndodhtë në fillim të mandatit, ditët e para që e merr njeriu detyrën dhe është një kohë e arsyeshme derisa të zhvillohen procedura, por pas dy vite qeverisjeje, qytetarët e Republikës mos të kenë mundësi të pajisen me dokumente udhëtimi dhe me dokumente të tjera personale është e pajustifikueshme. Bile është shumë qesharake, konflikti në Ukrainë? Çfarë ka lidhje konflikti në Ukrainë me dokumentet e udhëtimit në Kosovë?”, ka thënë Veliu për Kosovapress.
Nënkryetarja e PDK-së, Vlora Çitaku, ka thënë se dëshiron të besojë që ministri Sveçla nuk i ka shkruar një letër të tillë Gjermanisë.
Ajo thotë se “Në gjendje të jashtëzakonshme nuk jemi. As luftë e as pandemi nuk ka”. Përgjegjësinë ia lë Qeverisë.
Ish-ministrit Veliu jep një shpjegim pse, për të, një kërkesë e tillë është qesharake.
“Kjo kërkesë është shumë qesharake për mua, t’i bëhet kërkesë një vendi që të pranohen dokumentet e skaduara, nuk e di kujt i hyn në punë një dokument i skaduar, sepse kusht për udhëtim qytetarët e Republikës së Kosovës e kanë edhe vizën. Vizat nuk vendosen në pasaporta që nuk kanë afat. Ata njerëz që janë të pajisur me viza ata duhet ta kenë edhe vlefshmërinë e dokumentit, ndryshe nuk mund të pajisjet me vizë sepse është kusht. Kjo është një kërkesë fëmijërore, qesharake, që sigurisht e prish imazhin e Kosovës, institucioneve, ashtu siç duhet me qenë” , shton Veliu.
Shefi i Grupit Parlamentar të AAK-së, Besnik Tahiri, e bën po ashtu përgjegjës pushtetin e tanishëm për mungesën e materialit për pasaportë.
“Përmes logjikës së shkatërrimit të krejt asaj çfarë ishte ndërtu, përfshirë edhe ofrimin e shërbimeve, e sollën punën që qytetarët t’i lënë pa pasaporta. Kjo qeveri e ka konceptin që gjithçka fillon nga zero dhe gjithçka fillon me ta”, ka shkruar Tahiri.
Përgjatë fundjavës, komentet rreth kërkesës së Sveçlës kanë dominuar në rrjetet sociale.
Gazetari Ilir Mirena ka shkruar se problemi që kosovarët mbeten pa pasaporta është te tenderi për furnizimin me material për prodhimin e tyre.
“Pasaportat nuk prodhohen me naj material qe s’gjendet në planetin tonë. Letër hesapi, veç pak me specifika te tjera. Problem është tek tenderi”, ka shkruar Mirena.
Aktivisti Uk Lushi shkroi se dështimi për t’i pajisur qytetarët me pasaportë duhet të ketë pasoja. Ai thotë se ministri Sveçla duhet të largohet nga detyra.
Ky është dështim që duhet pasur konsekuenca patjetër. Ministri Xhelal Sveçla duhet ose të jap dorëheqje ose të shkarkohet. Ku jeni opozita? Duhet të bëni presion çdo ditë derisa të largohet ky aparatçik i paaftë.
Talljet me letrën e Sveçlës nuk kanë munguar, po ashtu, në rrjetet sociale.
Analisti Imer Mushkolaj e ka quajtur atë “ide gjeniale”.
“Në pritje t’përgjigjes së Gjermanisë për me udhëtu me pasaporta të skadume. Bravo Xhelal, ide Xheniale”.
Ish-deputeti prej Lëvizjes Vetëvendosje, Fisnik Ismaili, ka përdorur një frazë të njohur të partisë në pushtet, për të ironizuar me situatën me pasaporta.
“Qeveritë 20 viteve të kalueme kanë faj që e kanë harxhue krejt letrën e s’kanë ble letër të re për pasaporta me vakt!” , thuhej në një postim të tij.
Analisti Valon Syla ka pasur vetëm një pyetje. “Vetëm paramendone VV në opozitë çka i kish bo Xhelal Sveçlës nëse s’kish pasë letër për pasaporta”, shkroi ai në Facebook.
Problemet me furnizimin me pasaportë në Kosovë janë shfaqur prej shtatorit të vitit 2022. Në dhjetor u raportua se MPB ka kontraktuar kompaninë gjermane “Veridos GmbH” për ta furnizuar me pasaportë në 12 muajt e ardhshëm.
Por, në letrën që Sveçla ia ka dërguar Gjermanisë, ai kërkon që kosovarëve që kanë lejeqëndrim atje, t’u pranohen pasaportat e skaduar deri në qershor të këtij viti.
Nuk dihet se kur mund të nisë furnizimi me pasaporta, pasi MPB vazhdon të jetë e mbyllur për informacione. /Express/
