Libia ishte një nga nëntë shtetet të cilat presidenti i Serbisë, Aleksandar Vuçiq, i ka përmendur si shtetet që kanë tërhequr njohjen e Kosovës. Por, përkundër pretendimeve, Kosova dhe Libia janë pajtuar të mërkurën për thellim raportesh, ka bërë të ditur ambasadori i Kosovës në Belgjikë, Agron Bajrami.
“Në një bisedë miqësore, të zhvilluar në ambasadën e Libisë në Bruksel, dy ambasadorët diskutuan zhvillimet aktuale dhe sfidat e veçanta me të cilat përballen Kosova dhe Libia, përpjekjet e dy vendeve për forcimin e demokracisë dhe shtetësisë, si dhe situatat e përgjithshme gjeopolitike edhe në rajonin e Ballkanit Perëndimorë edhe në atë të Magrebit. Posaçërisht u fol për thellimin e marrëdhënieve mes dy vendeve dhe forcimin e bashkëpunimit Kosovë-Libi, si në politikë dhe diplomaci ashtu edhe në fushat tjera”, thuhet në njoftimin e Ambasadës së Kosovës në Belgjikë.
Bajrami po ashtu është shprehur se Kosova është mirënjohëse për përkrahjen e Libisë, e cila në vitin 2013 e ka njohur pavarësinë e Kosovës dhe prej vitit 2015 dy shtetet kanë marrëdhënie diplomatike. Ai ka shtuar se tani është koha që këto marrëdhënie të funksionalizohen e thellohen më shumë.
Në anën tjetër, ambasadorja Jerary u shpreh se Libia e mirëpret vullnetin e Kosovës për bashkëpunim më të madh, sidomos në fushën e diplomacisë, sipas njoftimit të Ambasadës.
