Ditëve të fundit, Dibran Hoxha, i njohur si “Kobra”, nga Burgu i Sigurisë së Lartë, ku ishte dërguar pas rastit të vrasjes në Prizren, është transferuar në Qendrën e Paraburgimit në Gjilan.
Burime të KALLXO.com kanë treguar se për transferimin e Hoxhës ka pasur një kërkesë nga organet e ndjekjes, kërkesë që është aprovuar nga Gjykata e Prizrenit.
Një 31-vjeçar nga Kukësi ka vdekur si pasojë e plagëve të shkaktuara nga arma e zjarrit dhe një tjetër është plagosur më 3 janar 2023.
Dibran Hoxha është i dyshuari kryesor për vrasjen që ka ndodhur në orët e mëngjesit të 3 janarit në lokalin e tij “Kobra City” në Prizren.
Përveç Hoxhës, për këtë rast janë arrestuar edhe pesë persona të tjerë.
Gjykata e Prizrenit ka caktuar masën e paraburgimit prej një muaj për 6 të arrestuarit.
I dënuar 17 herë për krime të ndryshme, Dibran Hoxha, i njohur si “Kobra”, po menaxhonte lirshëm biznesin e tij privat “Kobra City” në Prizren.
Lirinë ia mundësuan dënimet e buta të gjyqtarëve të Prizrenit të cilët në asnjë rast nuk e morën për bazë të kaluarën kriminale të tij.
Rrahje, armë pa leje, lëndime të rënda trupore, shmangie tatimore, vjedhje rryme, dëmtim i vulave zyrtare, dëmtim i pasurisë së huaj e kanosje, janë veprat penale për të cilat ishte dënuar ndër vite Dibran Hoxha.
KALLXO.com raportoi në vazhdimësi për rastet kriminale të regjistruara në sistemin e drejtësisë për Hoxhën.
