Ministri i Bujqësisë, Faton Peci, ka reaguar pas lajmit për arrestimin e dy personave që bënë dallavere me grante në emër të zyrtarëve të kësaj ministrie.
Peci e ka mirëpritur veprimin e policisë për arrestimin e të dyshuarve derisa ka thënë se do të vazhdojë angazhimin në luftimin e krimit dhe korrupsionit, shkruan Gazeta Online Reporteri.net.
“E përshëndes veprimin e ndërmarrë nga organet e rendit dhe drejtësisë gjatë ditës së sotme në luftimin e dukurive negative. Mbetem i përkushtuar në luftën kundër tentativave të tilla, krimit dhe korrupsionit”, shkroi ai në një postim në Facebook.
Ministri Peci ka falënderuar edhe bujqit që e kanë raportuar këtë rast me ç’rast bëri thirrje që raste si këto të denoncohen edhe nga të tjerët.
Dy persona janë kapur në flagrancë nga Drejtoria për Hetimin e Krimeve Ekonomike, pasi të njëjtit dyshohet se kanë kryer veprën penale “Ushtrim të ndikimit”.
Dyshimet janë se ata kanë pranuar para në emër të zyrtarëve të një ministrie nga dy persona të tjerë. Atyre u kanë premtuar se do t’i fusnin në listën e përfituesve të granteve, për një thirrje të hapur në po atë ministri.
“Lidhur me rastin dy personat e dyshuar janë arrestuar në flagrancë nën dyshimin për kryerjen e veprës penale të lartcekur, përderisa të gjitha veprimet tjera do të ndërmerren me autorizimin e prokurorit kompetent”, thuhet në njoftimin e policisë. /Reporteri.net/.
