Ministrat e Qeverisë së Kosovës vazhdojnë të mos raportojnë në komisione dhe kjo mbetet edhe sivjet shqetësim për deputetët e opozitës për dështime të mbledhjeve të Komisionit për Mbikëqyrjen e Financave Publike gjatë vitit të kaluar .
Deputetja e AAK-së, Albana Bytyqi, thotë se mbledhjet e Komisionit nuk kanë dështuar për shkak të mungesës së kuorumit, por për shkak të mosprezencës së ministrave për raportim.
Edhe deputeti i PDK-së, Hajdar Beqa theksoi se si pasojë e mungesës së ministrave për raportim, shumë mbledhje kanë dështuar, teksa shprehet i shqetësuar se e njëjta mund të ndodh edhe këtë vit.
Deputeti i VV-së, Eman Rrahmani thotë se ministrat e kanë për obligim të vijnë për të raportuar në komisione, ndryshe nga deputetët.
“Dallon raportimi i ministrit me atë të deputetit, sepse ministri e ka për detyrë dhe obligim me ardh me raportuar sa herë që i kërkohet, ndërsa deputeti mundet vetë me vendos a do me ardh apo jo. Edhe me rregulloren e re të punës, ministri duhet me ardh me raportuar”, tha Rrahmani.
Kryetarja e Komisionit për Mbikëqyrjen e Financave Publike, Hykmete Bajrami, tha se ministrat që ishin ftuar për raportim kishin mbajtur konferenca në Shqipëri.
“Ka pasur ministra të ftuar për raportim, ndërsa në media e kemi parë që i njëjti ka mbajtur konferencë për media në Shqipëri”, tha Bajrami duke përmendur rastin e ministrit Hekuran Murati i cili ishte i ftuar në këtë Komision, por që i njëjti kishte shkuar për një vizitë në pikën doganore në Shqipëri”, tha Bajrami.
