Kryeministri Albin Kurti bashkë me dy vartësit e tij, ministrin e Mbrojtjes Armend Mehaj dhe atë të Administrimit të Pushtetit Lokal Elbert Krasniqi, kanë vizituar disa nga zonat e vendit që po përballen me vërshime.
Kurti nga aty është zotuar se Qeveria dhe institucionet e Kosovës do t’u dalin në ndihmë banorëve të prekur.
Por, kryeministri nuk ka lënë pa përmendur edhe arsyet që sipas tij kanë lehtësuar, shpejtuar e shpeshtuar përmbytjet e vendbanimeve nga vërshimet.
Kurti ndër të tjera ka përmendur edhe mungesën e projekteve të pyllëzimit ndër vite dhe sistemet jo adekuate të kanalizimit dhe ujëmbledhjes.
“Dëmtimi i brigjeve dhe shtretërve të lumenjve nga eksploatimi i egër i zhavorrit, prerja ilegale e pyjeve ndër vite dhe mungesa e projekteve të pyllëzimit, sistemet jo adekuate të kanalizimit dhe ujëmbledhjes, si dhe ndryshimet klimatike globale i kanë lehtësuar, shpejtuar e shpeshtuar përmbytjet e vendbanimeve nga vërshimet”, ka shkruar ai./Reporteri.net/
