Kryeministri i Kosovës, Albin Kurti, ka bërë të ditur se Qeveria e Kosovës do t’i mbulojë financiarisht dëmet e shkaktuara nga reshjet e shiut.
Këtë Kurti e ka thënë në një prononcim për media, videoja e së cilës është publikuar në faqen zyrtare të Qeverisë në ‘Facebook’.
Shefi i Qeverisë ka njoftuar se është kthyer nga Davosi i Zvicrës për në Prishtinë mbrëmë, pak para mesnatës.
“Unë jam kthyer në Aeroportin Ndërkombëtar të Prishtinës mbrëmë pak para mesnatës. Erdha këtu që të shoh për së afërmi të shoh përmbytjet nga vërshimet e djeshme. Podujeva, Mitrovica, Skenderaj, Klina, Peja dhe Gjakova kanë përjetuar përmbytje të cilat ua kanë vështirësuar e rënduar jetën banorëve të këtyre anëve. Bashkë me kryetarin e Komunës, z. Ilir Feratin, me ministrat e Qeverisë së Republikës së Kosovës, ministrin e Mbrojtjes, Armend Mehajn dhe ministrin e Pushtetit Lokal, Elbert Krasniqin erdhëm që t’i vizitojmë edhe dy familje”, ka deklaruar ai.
“Qeveria e RKS me të gjitha institucionet e tjera do t’i ndihmojë dhe do t’i mbështes, mirëpo paraprakisht do të bëhet një vlerësim i këtyre dëmeve të shkaktuara dhe i nevojave që ta vazhdojnë jetën normalisht. Kur ishim në një vend në të cilin kishte pasur dalje të lumit nga shtati pamë që FSK ndodhej aty me kamion ushtarak dhe barkë lundruese për shpëtimin e banorëve dhe gjësendeve të tyre elementare”, ka thënë më tej Kurti.
