Presidentja Osmani sot për vizitë zyrtare në Vatikan

Presidentja e Kosovës, Vjosa Osmani, dje ka udhëtuar për vizitë në Shtetin e Vatikanit dhe në Itali.

Osmani, së bashku me zëvendëskryeministren Donika Gërvalla do të pritet nga Papa Françesku.

Presidentja do të ketë takim edhe me sekretarin e Shtetit të Vatikanit, kardinalin Pietro Parolin si dhe do të realizohen edhe një sërë takimesh e aktivitete të tjera.

Gjatë qëndrimit në Romë, Osmani do të pritet edhe nga Presidenti i Republikës Italiane, Sergio Mattarella, me të cilin do të diskutojnë për avancimin e bashkëpunimit bilateral si dhe rritjen e koordinimit për tejkalimin e sfidave aktuale të sigurisë në rajon dhe përtej.