Në Ditën Botërore të Edukimit, organizata “OAKTIV”, ka organizuar aktivitete për fëmijët me aftësi të kufizuara, ku ka zbuluar muralin sensibilizues për fëmijët me aftësi të kufizuara, me moton e “Ëndrrat e një fëmije me aftësi të kufizuar”.
Në aktivitete morën pjesë nënkryetarja e komunës Marigona Lahu, drejtori i drejtorisë së Arsimit, Avni Fetahu, Përfaqësuesja e Përhershme e UNDP-së në Kosovë, Maria Suokko, Menaxherja e Detyrave të Zhvillimit Social nga Zyra e Bashkimit Evropian Anne-Sophie Houee, Ambasadori i Malit të Zi në Kosovë Bernard Çobaj, drejtori i Shkollës Fillore të Mesme të Ulët “Shaban Shala” Nysret Ismajli, përfaqësues të organizatave si dhe mësimdhënës e nxënës.
Nënkryetarja e komunës Marigona Lahu, u shpreh e lumtur që sot janë mbledhur bashkë në zbulimin e muralit “Ëndrrat e një të riu me aftësi të kufizuar”, ku tha se murali shërben që të reflektojmë secili nga ne në krijimin e kushteve dhe infrastrukturës për fëmijët me nevoja të veçanta dhe reflektim mbi zhdukjen e paragjykimeve. Lahu u shpreh që “Superheronjtë e jetës janë fëmijët që kanë kaluar sfida të mëdha” e që të tillë janë fëmijët me nevoja të veçanta.
Aktiviteti u mbajt në kuadrin e projektit “Ec me këmbët e tyre”, mbështetur nga Programi Rajonal për Demokracinë Lokale në Ballkanin Perëndimor 2 – ReLOaD2, financuar nga Bashkimi Evropian (BE) dhe zbatuar nga Programi i Zhvillimit i Kombeve të Bashkuara (UNDP), ku si objektivi i përgjithshëm i ReLOaD2 është të forcojë demokracitë pjesëmarrëse, të përforcoj bashkëpunimin midis qeverisjes lokale dhe organizatave të shoqërisë civile dhe të promovojë angazhimin civil dhe të rinisë në vendimmarrje dhe në zhvillimin e komunitetit.
