Zyrtarët shtetërorë, duke përfshirë edhe pozita të larta të shtetit shpesh kanë qenë cak i kërcënimeve nga persona e grupe të ndryshme dhe për pasojë kanë kërkuar ndihmë e mbrojtje nga Policia. Për një rast të tillë tashmë ka nisur hetimet Prokuroria Themelore në Prizren, pas denoncimit të një rasti ku viktimë është kryetari i Komunës, Shaqir Totaj, raporton Gazeta Sinjali.
Lajmin e ka konfirmuar togeri i Policisë Rajonale në Prizren, Shaqir Bytyqi.
Sipas tij, Totaj ka marrë mesazhe kërcënuese rreth një prone që e pengon rrugën tranzit.
“Po dje kryetari i Prizrenit Shaqir Totaj ka raportuar se është kërcënuar. Kërcënimi ka ndodhur rreth orës 20:00 përmes një personi tjetër i cili i ka dërguar mesazhe kërcënuese. Ndërsa, rasti ka ndodhur për një pronë që e pengon rrugën tranzit. Pronari i asaj shtëpie nuk ka qenë i kënaqur me çmimin që i ka ofruar Komuna”, ka thënë Bytyqi.
Personat e dyshuar janë arrestuar dhe janë dërguar në mbajtje për 48 orë.
