Nën prangat e policisë ranë disa orë pas dyshimeve se kryen veprën penale. Ekrem Rexhepi e Shkelqim Kamberi bashkë me tre të mitur tjerë tash e pesë muaj per kete u privuan nga liria.
Të njëjtit akuzohen për dhunimin e nje 11 vjeçareje, në gusht të vitit që lamë pas.
Por një vendim i Gjykatës Themelore të Prishtinës u dha shpresë që së shpejti do të jenë të lirë.
Ani pse u bë publik një ditë më parë vendimin për hedhjen e aktakuzës për pesë të dyshuarit ishte marrë më datë 13 të këtij muaji.
Kësisoj Prokuroria Themelore e Prishtinës këtë të enjte dorëzoi ankesë në Gjykatën e Apelit.
Pak orë pas kësaj ankese, Apeli anuloi vendimin e Gjykatës Themelore për heqjen e aktakuzës, shkruan T7, përcjell Reporteri.net.
Ndërkohë avokati i 11 vjeçares Tom Gashi deklaroi që kjo është neglizhencë e bërë në kohën kur kanë nisur hetimet.
Veç tjerash Gashi tha që gjendja psikologjike e të miturës vazhdon të jetë e rëndë.
Pavarësisht që është avokat mbrojtës i të akuzuarit kryesor për këtë ngjarje të rëndë, Fitim Limani pohoi që nuk ka qenë në dijeni për këto vendime.
Sipas tij kjo është shkelje e Kushtetutës.
Ndërkohë secilin vendim te organeve te drejtësisë për këtë proces, Hajdar Rexhepi babai i dy prej të akuzuarve thotë se e përkrahë.
Rexhepi pohon gjithashtu që djemtë nuk e kanë qenë në dijeni për këto zhvillime.
Pesë të dyshuarit do të vazhdojnë të jenë në paraburgim deri në muajin shkurt.
