Më 1 shkurt zyrtarisht do të hyjë në fuqi Ligji për paga për sektorin publik, mirëpo vlera e koeficientit ende nuk është bërë e ditur.
Ligji për Pagat është dekretuar në fillim të muajit nga Presidentja Vjosa Osmani dhe pritet të hyjë në fuqi nga shkurti, por vlera e koeficientit që përcakton kush sa do të paguhet, ende s’është bërë e ditur.
Nga Qeveria s’është dhënë asnjëherë ndonjë shifër se sa do të jetë vlera, përveçse do të përcaktohet në janar.
Ligji është hedhur në votim dhe miratuar nga deputetët pa e ditur vlerën e koeficientit. madje edhe është dekretuar nga Presidentja.
Nga ekzekutivi disa herë kanë thënë se vlera e tij do të bëhet e ditur brenda këtij muaji.
Për këtë çështje dje ka folur Ministri i Financave, Hekuran Murati, por duke mos treguar asgjë për vlerën e koeficientit.
Ministri Murati ka thënë se Ligji për paga dhe koeficientët janë duke u përllogaritur, ashtu siç vijnë informatat nga organizatat buxhetore.
”Është duke u përllogaritur, ashtu siç vijnë informatat nga organizatat buxhetore. Momentin kur bëhet mbledhja e këtyre, mund të dihet vlera e koeficientit”, ka thënë Murati.
Ndërsa, i pyetur se a do ta marrin qytetarët pagën me rritje në muajin në vijim, ai ka thënë se ligji për paga nuk e përcakton rritjen e pagave, por koeficientin e pagave, ndërsa ka thënë se rritja e pagave përcaktohet me ligjin për buxhet.
“Rritja e pagave përcaktohet me ligjin për buxhet, Ligji i Pagave i përcakton koeficientët”, ka thënë dje Murati.
Përfaqësues të Sindikatave në Kosovë kanë shprehur shqetësimin që ende nuk është përcaktuar koeficienti për pagat e zyrtarëve publikë.
