Njohësi i zhvillimeve politike në Ballkanin Perëndimor dhe profesori i Universitetit të Grazit, Florian Bieber ka thënë se ndërkombëtarët ende shohin potencial që presidenti serb, Aleksandar Vuçiq ta zgjidhë problemin me Kosovën.
Ai po ashtu ka thënë se Vuçiq e ka pranuar propozimin franko-gjerman vetëm me shpresën që Qeveria e Kosovës do ta refuzojë atë.
Bieber u shpreh se Vuçiq po e shfrytëzon në favor të tij bindjen e ndërkombëtarëve për të mbetur në pushtet.
“Ai po përdor prioritetet ndërkombëtare për interesat e tij”, ka thënë Bieber.
“Ka ende një përshtypje se ai është njeriu që mund ta zgjidhë problemin me Kosovën. Kjo pritje ekziston. Vuçiq mbijeton mbi këtë ide, mbi idenë se ai është njeriu që mund ta kryej këtë punë”, ka vlerësuar ai.
Ai ka folur edhe për propozimin franko-gjerman, duke ka thënë se ky hap nuk mund të jetë zgjidhja finale, por vetëm një hap i ndërmjetëm. Sipas tij, Vuçiq e ka pranuar propozimin me bindjen se pala tjetër (Kosova) nuk do ta pranojë.
“Do të ishte ideale për të, që propozimi të dështojë për shkak të qëndrimit të Qeverisë së Kosovës. Kjo nuk do të ndodh. Pranimi i propozimit ka qenë mënyra e tij për ta hedhur përgjegjësinë te Prishtina”, ka thënë ai për televizonin N1.
Bieber ka vlerësuar se në këtë kohë, për Kosovën nuk është shumë e rëndësishme njohja nga Serbia, por njohja nga pesë vendet anëtare të Bashkimit Evropian.
