Presidenti serb Aleksandar Vuçiq tha se do të shkojë në Bruksel vetëm kur të bëhet Asociacioni i Komunave me shumicë serbe.
Këtë deklaratë, Vuçiq e bëri gjatë ditës së djeshme, pasi përfaqësuesi i lartë për politikë të jashtme, Josep Borrell, ka njoftuar se do të ftojë Vuçiqin dhe kryeministrin e Kosovës Albin Kurti në Bruksel për të diskutuar mbi planin evropian “së shpejti”, shkruan Reporteri.net.
Në anën tjetër kryeministri i Kosovës, Albin Kurti gjatë javëve të fundit disa herë ka përsëritur se nuk do të tolerojnë që Asociacioni të ju vihet si parakusht në negociata.
Kurti ditë më parë tha se faktori ndërkombëtar është duke insistuar për zbatimin e marrëveshjes për Asociacionin, por theksoi se është e padrejtë që Marrëveshja për Asociacionin të jetë parakusht për të nisur bisedimet Kosovë-Serbi konform planit franko-gjerman, i njohur tashmë si propozimi i BE-së për normalizim të marrëdhënieve mes dyja vendeve, propozim ky të cilin Kurti ka konfirmuar se Kosova në parim tashmë e ka pranuar.
Këtë Kurti e ka përsëritur edhe gjatë ditës së djeshme në seancën e Kuvendit ku po fliste për planin franko-gjerman për normalizim të marrëdhënieve.
Ai thotë se në Beograd po bëhet luftë politike që njëra pikë të vendoset para të tjerave që Asociacioni të jetë parakusht e në qendër.
“Në kapitullin pesë ka qenë konsiderimi i marrëveshjeve të mëhershme. Fjalia e fundit në nenin 10 të propozimit u referohet të gjitha marrëveshjeve në Bruksel. Por beteja politike është që prej 33 marrëveshjeve Beogradi dëshiron ta përcjellë vetëm njërën që e ka më të dashur. Për ne ato nuk kanë hierarki vlerore e logjike, kanë rend kronologjik. Nuk mund ta vendosësh njërën para tjetrës. Po zhvillohet një betejë e madhe politike e diplomatike. Neni 10 që i referohet marrëveshjeve të mëhershme po tentohet të nxirret në preambulë. Në propozimin e BE-së është e fundi në nenin 10. Beogradi po kërkon që Asociacioni të jetë parakusht, ose në qendër, por për neve nuk është i pranueshëm as si parakusht as si qendër. Propozimi i BE-së është shumë i favorshëm për ne sepse Asociacionin nuk e ka parakusht as në qendër”, ka thënë Kurti gjatë ditës së djeshme.
Nga Bashkimi Evropian ditë më parë për Reporteri.net kanë komentuar deklaratën e Kurtit rreth Asociacionit, duke theksuar se të gjitha marrëveshjet e Dialogut duhet të zbatohen pa vonesa të mëtejshme dhe pa asnjë kusht, duke përfshirë këtu edhe Asociacionin.
Kujtojmë se gjatë ditës së djeshme, përfaqësuesi i lartë i Bashkimit Evropian për politikë të jashtme dhe siguri Josep Borrell, ka paralajmëruar se së shpejti do të ftojë në takim Kurtin e Vuçiqin.
“Propozimi është në tavolinë. I kam ftuar dy liderët që të vinë në Bruksel së shpejti, brenda disa javësh, në mënyrë që definitivisht të shtyjmë përpara këtë propozim“, ka thënë Borrell.
Por, pas deklaratës së Vuçiqit se do të shkojë në Bruksel për negociata vetëm pasi të themelohet Asociacioni dhe 6 kushteve të Kurtit, zyrtarë të Bashkimit Evropian vlerësojnë se deklaratat publike të liderëve të Kosovës dhe Serbisë, ku ata paraprakisht paraqesin kushte, janë pengesë në organizimin e një takimi të nivelit të lartë në Bruksel.
Kurti i cili thoshte se Asociacioni nuk është prioritet i Qeverisë së tij, javën e kaluar shpalosi gjashtë kushtet për formimin e tij.
Gjashtë kushtet e Kurtit:
-Asociacioni të bëhet në përputhje me Kushtetutën e Kosovës dhe ligjet në fuqi.
-Asociacioni nuk mund të jetë monoetnik, duhet të ndërrojë emrin, nuk mund të ketë/bartë asnjë pushtet publik (apo ekzekutiv) dhe duhet t’i shërbejë vetëm bashkëpunimit horizontal të komunave sipas Kushtetutës dhe ligjit për vetëqeverisje lokale (kreu 5).
-Të drejtat e pakicave kombëtare duhet ta ngërthejnë parimin e reciprocitetit ndërmjet dy shteteve si dhe të marrin parasysh standardet dhe modelet evropiane.
-Para vendosjes së Asociacionit, strukturat ilegale në veri të shuhen dhe bëhet dorëzimi i të gjitha armëve ilegale.
-Asociacioni është pjesë e marrëveshjes finale dhe zbatohet pas njohjes reciproke dhe pasi Serbia t’i ketë pranuar parimet e kartës së OKB-së në raport me Kosovën.
-Presidenti i Serbisë i tërheq letrat e dërguara te pesë (dhe tek të tjera) shtetet anëtare të BE-së për mospranimin e aplikimit të Republikës së Kosovës për anëtarësim në BE, që paraqet edhe shkelje të po asaj marrëveshjeje Thaçi-Daçiq të 19 prillit 2013. /Reporteri.net/
