Parlamenti Studentor i Universitetit të Prishtinës, ka filluar të marshojë kundër themelimit të Asociacionit të komunave me shumicë serbe ashtu siç ka paralajmëruar.
Protesta është thirrur në vigjilje të 53 vjetorit të themelimit të Universitetit të Prishtinës.
“Asociacioni një etnik është në kundërshtim me Kushtetutën e Republikës sonë. Kështu sepse asociacioni i komunave me shumicë serbe nuk do të thotë më shumë të drejta për komunitetin serb, por më shumë ndikim të Serbisë mbi territorin e Kosovës” thuhet në njoftimin e Parlamentit Studentor.
Nisja për në protestë është organizuar nga disa komuna të vendit, teksa transporti ka qenë falas.
Protestuesit u mblidhen në oborrin e Bibliotekës Kombëtare “Pjetër Bogdani” për të marshuar pastaj drejt qendrës së kryeqytetit.
Në vitin 2013 është arritur marrëveshja mes Kosovës dhe Serbisë për Asociacionin, ndërsa më 2015, Gjykata Kushtetuese e Kosovës ka gjetur se marrëveshja nuk është në harmoni të plotë me Kushtetutën.
Kryeministri i Kosovës, Albin Kurti, i cili deri më tani ka kundërshtuar fuqishëm krijimin e Asociacionit njëetnik, më 2 shkurt shpalosi para deputetëve të Kuvendit të Kosovës gjashtë kushtet për formimin e tij.
