Presidentja Vjosa Osmani tha sot në një panel diskutimi për “Gratë, Paqja dhe Siguria” në Konferencën e Mynihut se sa më shumë gra marrin pjesë në këto çështje aq më shumë do të ketë rezultate pozitive për të gjithë.
Ajo ka folur për rolin e grave kosovare paraluftës dhe gjatë luftës.
Osmani ka pohuar se gratë në Kosovë kanë pasur rol udhëheqës dhe shumë të rëndësishëm gjatë viteve të ’90-ta në rezistencën paqësore kur populli i Kosovës ishte viktimë e aparteidit, regjimit të Millosheviqit ku praktikisht të gjitha të drejtat e njeriut ishin të shkelura nga regjimi i dhunshëm.
Osmani ka shtuar tutje se gratë në Kosovë ishin shumë të përfshira edhe gjatë luftës çlirimtare dhe shumë prej tyre kanë rënë si dëshmore.
Presidentja tutje ka shtuar se Kosova është ndër storiet më të mira të suksesit dhe është shembull i shtetit demokratik.
“Besoj fuqishëm dhe besoj se të gjithë ndërkombëtarët që janë të përfshirë në një mënyrë ose tjetër me procesin e shtetndërtimit të Kosovës e dinë se Kosova është një ndër storie më të mira të suksesit, është shembull i shtetit demokratik”, ka thënë Osmani. /Reporteri.net/.
