Me një manifestim të organizuar nga Drejtoria Komunale e Arsimit është shënuar 7 Marsi – Dita e Mësuesit në Podujevë, me ç’rast me mirënjohje janë nderuar veteranë të arsimit dhe mësimdhënës të dalluar. Poashtu në shënim të kësaj ngjarje ishte përgatitur program kulturor për ta begatuar shënimin e kësaj dite.
Për nder të 7 Marsit – Ditës së Mësuesit, në objektin e destinuar për galeri të qytetit është mbajtur manifestimi për shënimin e kësaj dite, ku përveç mësimdhënësve dhe veteranëve të arsimit ishte i pranishëm kryetari i Komunës, Shpejtim Bulliqi, nënkryetarja Marigona Lahu, kryesuesi i Kuvendit Hilmi Hoxha, drejtori i Arsimit Avni Fetahu dhe zyrtarë të tjerë komunalë.
Kryetari Bulliqi duke uruar mësimdhënësit për Ditën e Mësuesit, tha “Në festën e mësuesit ndaj mirënjohjen dhe respektin për kontributin e gjithë atyre mësimdhënësve ndër vite që me përkushtim u kujdesën për edukimin e brezave dhe ruajtjen e gjuhës, kulturës dhe traditave shqiptare. Roli i mësuesit shqiptar ishte shumë dimensional përveçse emancipues e edukues, mësuesi shqiptar i frymëzoi dhe i brymosi gjeneratat e reja me frymën e atdhedashurisë e angazhimin për çështjen kombëtare”.
“Mësues të nderuar – Nga zemra ju uroj festën e 7 marsit dhe ju dëshiroj shumë suksese në punën tuaj fisnike” përfundoi fjalën kryetari Bulliqi.
Me këtë rast kryetari Bulliqi, nënkryetarja Lahu, kryesuesi Hoxha dhe drejtori i arsimit Fetahu i ndanë mirënjohjet me të cilat Komuna e Podujevës ka nderuar veteranët e arsimit dhe mësimdhënësit e dalluar të shkollave fillore dhe të mesme. Me mirënjohje të veçanta post mortum, janë nderuar mësimdhënësit që kanë ndërruar jetë gjatë vitit të fundit. Mirënjohjet i morën familjarët e tyre.
