ADVERTISEMENT
Nën udhëheqjen e Kryetarit të Komunës Shpejtim Bulliqi u mbajt mbledhja e parë e Këshillit Komunal për Siguri në Bashkësi (KKSB) për vitin 2023. Në këtë mbledhje u analizua mbarëvajtja e rendit dhe qetësisë publike, angazhimi në komunikacion dhe rastet e dhunës në familje.
U miratua ekstrakti i procesverbalit të mbledhjes së mbajtur më 5 dhjetor të vitit 2022.
Lidhur me gjendjen e sigurisë në Komunën e Podujevës raportoi Komandanti i Stacionit Policor në Podujevë, Nijazi Jashari se për vitin 2022 ka pasur 263 vepra penale, 3 vrasje, 5 tentativa për vrasje dhe 11 vdekje të dyshimta, raste të dhunimit 1, keqtrajtim seksual 5, braktisje të fëmijëve 6.
Gjatë vitit 2022 në stacionin policor të Podujevës janë ndaluar 240 persona, arreste shtëpiake 76, sa i përket trafikut ka pasur 281 aksidente me dëme materiale, 53 prej tyre me persona të lënduar, janë shqiptuar 9725 tiketa trafiku, që ka rezultuar të jenë rreth 35% më tepër se vitin e kaluar, përgjatë 2022 janë konfiskuar 199 vetura dhe 164 armë pa leje.
Përfaqësuesi i KFOR-it Oliver Izmay gjendjen e përgjithshme të sigurisë në Komunën e Podujevës e ka vlerësuar të qetë dhe stabile, duke theksuar se KFOR nuk ka hasur në indikacione të cilat e rrezikojnë rendin dhe qetësinë në vend.
Togerja e FSK-së Ilirjana Bunjaku ka thënë se gjendja në Komunën e Podujevës është e qetë dhe stabile, ndërsa ka shtuar se FSK gjatë kësaj kohe nuk ka pasur ndonjë aktivitet që vlen të potencohet.
Ndërsa sa i përket planit të punës për vitin 2023 anëtari i Shoqërisë Civile, Shesmi Jashari ka thënë se plani i punës për vitin 2023 është përafërsisht i njëjtë me atë të vitit paraprak, në këtë plan të punës adresohen shumë çështje që na preokupojnë në jetën e përditshme dhe me grupin punues kemi vendosur disa objektiva për qasjen tonë ndaj fenomeneve të ndryshme që na prekun si shoqëri.
Ndërsa Drejtori i Drejtorisë së Arsimit, Avni Fetahu shtoi se në plan të punës parashihen edhe aktivitetet në nivel të shkollave, për edukime mbi ruajtjen e rendit dhe qetësisë publike.
Propozimi i planit të punës së KKSB-së për vitin 2023 u aprovua dhe kaloi për shqyrtim në kuvend.
27.03.2023, Podujevë
Zyra për Marrëdhënie me Publikun dhe Informim
