Dy persona janë gjetur të vdekur të mërkurën në shtëpitë e tyre në Prizren dhe Gjakovë.
Sipas raportit 24-orësh të Policisë së Kosovës, me vendim të prokurorit trupi i pajetë i viktimës në Prizren është dërguar për obduksion.
Ndërsa organet e rendit kanë njoftuar personi tjetër që është gjetur i vdekur në Gjakovë, sipas familjarëve ka qenë me probleme shëndetësore dhe nuk kanë ndonjë dyshim për shkakun e vdekjes.
“Me vendim të prokurorit trupi i pajetë u është liruar familjarëve për ceremoni mortor”, thuhet në njoftim.
Ndërkaq në Graçanicë persona të panjohur me forcë kanë depërtuar në brendinë e shtëpisë së ankueses femër serbe dhe nga aty kanë vjedhur një sasi stoli ari dhe argjendi dhe para të gatshme.
“Rasti është në procedurë hetimore”, ka njoftuar policia.
Sipas policisë, në Shtime ka ndodhur një aksident trafiku në mes dy automjeteve.
“Përveç dëmeve materiale lëndime trupore kanë pësuar pesë persona të cilët kanë pranuar tretman mjekësor”.
Po ashtu në Rahovec ka ndodhur një aksident trafiku në mes dy veturave me targa vendore me drejtues meshkuj kosovarë.
“Përveç dëmeve materiale lëndime trupore kanë pësuar dy meshkuj njëri kosovar dhe tjetri shtetas i Shqipërisë . Të lënduarit kanë pranuar tretman mjekësor. Lidhur me rastin është arrestuar i dyshuari mashkull kosovar dhe me vendim të prokurorit është dërguar në mbajtje” .
Sipas raportit, janë raportuar edhe 10 raste të dhunës në fëmije në qytete të ndryshme të Kosovës.
/Albanianpost.com
