Asociacioni i Gazetarëve të Kosovës, ka reaguar ndaj Blerim Velës, shef i stafit të presidentes Vjosa Osmani, pasi ky i fundit disa raportime për shkarkimin e Osmanit i cilësoi si ‘puç’, shkruan Gazeta Metro.
AGK’ja në reagimin e saj, postimin e Velës e ka quajtur si skandaloz dhe se, kjo nuk është hera e parë që Vela ka sulmuar mediet.
Në reagim shtohet se, gjuha e Velës, është e papranueshme dhe shume e rrezikshme.
Komunikata e plotë:
AGK: E rrezikshme dhe e papranueshme gjuha e Shefit të Stafit të Presidentes Osmani, Blerim VelaJo për herë të parë, Blerim Vela – Shef i Stafit të Presidentes së Kosovë, Vjosa Osmani, ka sulmuar mediet e Kosovës, pas raportimeve për një vendim të pritshëm të Gjykatës Kushtetuese për deputetë të minoriteteve në Kuvendin e Kosovës, që si zinxhir mund të vë në pikëpyetje zgjedhjen e Presidentes
Vela në një postim skandaloz në Twitter, thotë se raportimet e medieve të Kosovës “janë pjesë e luftës speciale të realizuar sipas skemës së përgatitur nga Beogradi dhe të realizuar përmes kriminelëve të veriut dhe sekserëve të tyre, të cilët ndodhën në listën e zezë të SHBA-së”. Kjo është një gjuhë e papranueshme dhe shumë e rrezikshme që rëndon ambientin e punës së gazetarëve në Kosovë. Për më tepër është vazhdimësi e sulmeve të zotit Vela ndaj medieve.
Teksa merr pjesë në Samitin e Demokracisë, AGK-ja i bën thirrje të përsëritur presidentes Vjosa Osmani që përfundimisht të ndalojë sulmet ndaj medieve nga kabineti i saj, e që shërbejnë si presion direkt në punën e tyre.
