Analisti Sabri Ramabaja ka thënë sonte se gjyqi për ish-krerët e UÇK-së, i cili filloi sot në Hagë, mund të zgjasë nga pesë deri në gjashtë vite.
Ramabaja, që është një nga përkrahësit e Lëvizjes Vetëvendosje, shtoi se pret që ata do të dënohen, transmeton Paparaci.
Sipas tij, gjyqi pritet të jetë i gjatë pasi ka shumë dëshmitarë që do të pyeten.
“Mund të zgjasë relativisht gjatë sepse ka një numër shumë të madh të dëshmitarëve. Mund të shkojë 5 deri në 6 vjet minimumi dhe kjo është hapi i parë që bëhet shkelja themelore e të drejtave të njeriut sepse ata nuk duhet të mbaheshin në gjykatë kaq gjatë”, tha ai sonte në Euronews Albania, transmeton Paparaci.
“Sipas gjithë parametrave të aktakuzës, unë për një pjesë të mirë, jo vetëm të atyre që janë tashmë aty, por edhe të tjerëve pres që të dënohen, arsyeja se pse po bëhet kjo është e natyrës politike dhe gjeopolitike. UÇK-ja ka qenë guerilja më e suksesshme e historisë moderne të Evropës dhe një sinjal i dërgohet të gjithë popujve të tjerë të robëruar siç ishte Kosova një koloni atipike në zemër të Evropës, e panjohur madje si koloni. Ne nuk mund t’i mbrojmë as këta që janë sot në gjykatë dhe as të tjerët, duke sulmuar gjykatën”, tha ai.
