Zëvendëskryeministri i Kosovës, Besnik Bislimi, është deklaruar pas takimit bilateral me emisarin e BE-së për dialogun me Serbinë, Miroslav Lajçak dhe atë trilateral me kryenegociatorin serb, Petar Petkoviq.
Ai tha se pati një dakordim fillestar që takimi i radhës në nivelin e lartë politik të mbahet më datën 22 prill, “mirëpo kjo në momentin e fundit nuk është aq edhe e sigurt pasi ka indikacione që presidenti i Serbisë nuk është i gatshëm ose nuk mund të vijë në këtë datë”.
Bislimi para gazetarëve u shpreh se “jemi duke shqyrtuar data alternative”, raporton Paparaci.
Gjithashtu, Bislimi teksa tregoi temat e folura në takim, theksoi se është diskutuar për prezantimin e draftit fillestar të grupit të menaxhmentit rreth vetëmenaxhimit të komunitetit serb në Kosovë.
“Ideja është në që këtë datë të prezantohet një draft fillestar i grupit të menaxhmentit. Ka pak paqartësi në atë si duhet të ecin procedurat, kujt duhet t’i dërgohet drafti paraprakisht dhe si duhet të prezantohet. Kemi diskutuar edhe temat aktuale siç është ajo e energjisë dhe për shembull ku kemi diskutuar për çështjen e targave se si po ecën implementimi”, u shpreh Bislimi.
“Unë kam raportuar se deri në fund të marsit ka pasur një zhvillmi të mirë, por pas kërcënimit dhe djegieve veturave në ditën e hanë nuk ka pasur vetura të regjistruara. Ka pasur kërkesa të Serbisë se Kosova prapë do tregojë vullnet të mirë dhe mos të vendos masa ndaj tyre, por kjo ka punë ka kaluar dhe më nuk mund të diskutohet për targat, që duhet të zbatohet”, shtoi ai.
Ai tregoi se kanë diskutuar mënyrën “se si duhet të sekuencohen hapat e tjerë që janë pjesë e marrëveshjes bazike”, duke filluar nga marrëveshja për të pagjeturit, njohja reciproke e diplomave si dhe zotimi i Beogradit që mos ta pengojë anëtarësimin e Kosovës në organizata ndërkombëtare.
