Bashkëjetesa me vajza të mitura është shndërruar në dukuri shqetësuese në vendin tonë, ku shpesh raportohen raste kur vajzat e moshave të vogla krijojnë raporte të afërta me persona të moshave madhore, raporton Gazeta Sinjali.
Kështu ka ndodhur së fundi në Drenas, ku një vajzë e mitur është larguar nga shtëpia e saj, pa dijeninë e familjes.
Sinjali mëson se kjo ka alarmuar babain e saj dhe ka aktivizuar Policinë që të nisin kërkimet për 16-vjeçaren, e cila sipas prindit, kishte shkuar të një person i rritur në Lipjan.
Bazuar në dëshminë e babait të viktimës, vajza e tij është njoftuar me të dyshuarin përmes rrjeteve sociale dhe më pas ka shkuar që të jetojë në shtëpinë e tij.
Me urdhër të prokurorit, ndaj të dyshuarit është iniciuar rasti ‘Bashkëjetesë jashtëmartesore me persona nën moshën 16-vjeçare’, ndërsa e mitura është dërguar në strehimore.
