Në moshën 61 vjeçare, është ndarë nga jeta këtë të Hënë të 10 Prillit, daullisti/bateristi i njohur kosovar, i grupve të njohura të kohës, ‘Besnikët’ dhe ‘Yjet’ nga Prishtina, Ekrem Jusufi, i njohur në mesin e kolegëve me emrin artistik – Dajka.
I ndjeri prej kohësh lëngonte nga shqetësimet në veshka, ndërsa nga angazhimi aktiv në muzikë ishte tërhequr kohë më parë, derisa po mjekohej në Gjermani, ku edhe ka ndërruar jetë.
Lamtumira e fundit, do ti ipet në vendlindje, në Prishtinë, ditën e Enjtë, me13 Prill.
Në muzikën popullore, i ndjeri tashmë, Ekrem Jusufi – Dajka, njihej si daullist-baterist me tingull kompakt dhe shquhej për precizitet në takt.
Përgjatë zotërimit të daulleve/baterive në përcjellje të muzikës popullore, Ekrem Jusufi – Dajka, shquhej në ritmin e theksuar qartë në dobosh, të cilin e kishte specialitet.
Përgjatë viteve, karriera muzikore e tij lulëzoi me Grupin muzikor të kohës ‘Besnikët’ dhe këngëtarin Sinan Vllasaliu dhe Grupin e mëpastajmë ‘Yjet’ me këngëtarin Afrim Muçiqi. Në të dyja këto grupe, Ekrem Jusufi – Dajka, ishte bateristi i preferuar i udhëheqësit artisitk të tyre, kompozitorit Afrim Macula.
Ka reaguar pas vdekjes, ky i fundit.
‘Na shkoj Dajka ( Ekrem Jusufi). Gjithmone ne zemrat dhe kujtimet tona! Të Allahut jemi dhe tek ai do te kthehemi!.’-ka shkruar me pikëllim bashkëpunëtori i tij, kompozitori Afrim Macula, në fotokujtimin e publikuar nga Grupi ‘Yjet’.
‘Nje mik i pashoq i cili na la shume kujtime te bukura , muzike dhe tregime te shumta .
Do te kujtojme gjithmone me shume mall. Ngushellime gjithe familjes, miqve dhe komunitetit.’-ka shkruar Florent Boshnjaku, kompozitor dhe krijues i njohur.
Ka reaguar edhe fis-harmoniksti i njohur nga Rahoveci, bashkëpunëtorë i të ndjerit, përgjatë rrugëtimit me Grupin ‘Yjet’, Fatmir Pista.
‘Mbetëm edhe pa një artist. Ekrem Jusufin, baterist i njohur. Zoti e shpërbleftë me parajsë! Ngushëllime familjes, shoqërisë dhe mbarë komunitetit të artistëve muzikorë! U prehsh në paqë!’-shkruan Pista./RADIO 1/
