Pjesëtarët e Policisë së Kosovës kanë zhvilluar sot një aksion në veri të Kosovës me qëllim të arrestimit të një personi në lidhje me narkotikët. Nuk e gjetën, por gjetën një person tjetër dhe makineri për prodhimin e kriptomonedhave.
“Gjatë bastisjes kanë gjetur makina për prodhimin e kriptovalutave”, na ka thënë zëvendëskomandanti i sapoemëruar i Policisë së Kosovës për rajonin e Veriut, Veton Elshani.
Policët kanë njoftuar Doganën e Kosovës, e cila zakonisht merret me raste të tilla, për atë që kanë gjetur.
Doganierët kanë dalë në terren dhe kanë marrë makineritë, por kanë ndaluar edhe një person që ndodhej në pallat. Një hetim është duke u zhvilluar, na ka konfirmuar Elshani.
Ai nuk ka informacion për momentin për numrin dhe llojin e makinerive të minierave të kriptovalutave që janë sekuestruar, duke thënë se pritej një raport doganor.
Nga ana tjetër, ai thotë se rasti i lëndëve narkotike lidhet me një laborator droge që ishte zbuluar më parë.
“Tashmë me urdhër të gjykatës kërkojmë një person të lidhur me lëndët narkotike”, tha ai.
Ministri i Punëve të Brendshme të Kosovës, Xhelal Sveqla, më herët ka bërë të ditur se policia po zhvillon aksion kundër keqpërdorimit të energjisë elektrike në veri të Kosovës, përkatësisht në lidhje me kriptovalutat.
