U. B. dyshohet se sulmin e tij e filloi pas një debati që pati me një oficer policie në një park në fshatin Dubona të Beogradit.
Siç njoftoi Ministria e Brendshme e Serbisë, arrestimi i të dyshuarit u bë sot në mëngjes, rreth orës 08:40, pranë Kragujevacit.
Pas vrasjeve që dyshohet që i kreu, U. B. deri para pak orësh ishte në kërkim policor.
Siç raportojnë mediat lokale serbe, për gjetjen e tij u angazhuan mbi 600 zyrtarë policor, përderisa në terren ishin parë edhe helikopter e dronë që kërkonin të dyshuarin.
Në zonën ku ndodhi ngjarja raportohet se ishin vendosur disa postblloqe policore që kontrollonin në detaje veturat që kalonin andej pari.
Raportimet e mediave serbe bëjnë të ditur se i arrestuari filloi të qëllonte mbi njerëzit me një armë automatike nga një veturë që ishte në lëvizje.
Qytetarët tregojnë se me të dëgjuar të shtënat, menjëherë janë mbyllur në shtëpitë e tyre, teksa shprehen se është për të ardhur keq ajo që ka ndodhur.
Nga ora 10:30, presidenti serb, Aleksandar Vuçiq dhe anëtarë të tjerë të qeverisë serbe u njoftua që do të mbajnë një konferencë për media për t`u adresuar lidhur me ngjarjen.
Sipas televizionit publik serb, RTS, të gjithë të lënduarit e pranuar në spital kanë lindur pas vitit 2000.
Po ashtu raportohet se dy persona të moshës 21 dhe 23 vjeçare janë operuar, por mbeten në gjendje kritike.
Ministrja e Shëndetësisë, Danica Grujiçiq, dhe kreu i Agjencisë së Inteligjencës së Sigurisë, Aleksandar Vulin, thuhet se kanë udhëtuar në zonën ku ndodhi sulmi në orët e para të së ditës së sotme.
Ky është sulmi i dytë masiv që ndodhi brenda javës në Beograd, ku numri total i viktimave në të dyja rastet është 17 persona, në mesin e tyre disa të mitur.
Pak ditë më parë, një adoleshent vrau nëntë persona në një shkollë në Beograd.
I dyshuar në këtë ngjarje është një djalë 13 vjeçar, i cili vrau tetë bashkënxënës në shkollën e tij, si dhe një roje sigurie, e po ashtu la disa të tjerë të plagosur.
Ai u raportua se është arrestuar, e nën pranga të policisë mbetën edhe prindërit e tij.
