Sipas një hulumtimi nga Universiteti i Kalifornisë, i publikuar në revistën “Scientific Reports” mosha, gjinia, pesha dhe pirja e duhanit janë faktorë që ndikojnë në efektivitetin e vaksinave kundër Covid -19.
Në studimin e qershorit 2021, studiuesit studiuan përgjigjen ndaj vaksinave nga Pfizer , Moderna, Johnson & Johnson në mostrat e gjakut nga 498 vullnetarë të shëndetshëm, të moshës 18-88 vjeç.
Ata matën nivelet e antitrupave të prodhuar nga vaksinimi që parandalon infeksionin me Covid-19.
Një muaj pas vaksinimit, ata që u vaksinuan me Pfizer kishin një përgjigje antitrupash 21 herë më të lartë se ata që morën Johnson & Johnson, ndërsa ata që morën Moderna kishin një përgjigje 51 herë më të lartë se ata që morën Johnson & Johnson.
Për të siguruar saktësinë, vullnetarët u kontrolluan për infeksion të mëparshëm Covid-19 përpara se të vaksinoheshin.
Befasia ishte se gjashtë muaj pas vaksinimit, të vaksinuarit me Johnson & Johnson tejkaluan nivelet e antitrupave të atyre që morën Pfizer dhe arritën nivele të ngjashme të antitrupave me ata të vaksinuar me Moderna, pasi nivelet e antitrupave për vaksinat e tjera Pfizer dhe Moderna po uleshin.
Përveç kësaj, studiuesit zbuluan se edhe faktorë të tjerë ndikuan në efektivitetin e vaksinave. Në mesin e të rriturve të moshuar, antitrupat ishin 17% më të ulëta për ata që morën Pfizer dhe 11% më i ulët për ata që morën Johnson & Johnson.
Në ata me një indeks më të lartë të masës trupore, antitrupat ishin 11% më të ulëta tek personat e vaksinuar me Johnson & Johnson, por jo tek ata të vaksinuar me Pfizer ose Moderna.
Tek meshkujt, antitrupat ishin 30% më të ulëta se tek femrat, pavarësisht nga lloji i vaksinës dhe te duhanpirësit ishin 240% më të ulëta se te joduhanpirësit, përsëri pavarësisht nga lloji i vaksinës.
Studiuesit theksojnë se gjetjet e studimit mund të zbatohen edhe për vaksinat e reja që përfshijnë variantet Omicron dhe faza tjetër e kërkimit do të fokusohet në efektivitetin e këtyre vaksinave të reja.
