Para pak ditëve, gazeta Insajderi, raportoi se veturat zyrtare të Podujevës duhet të bëjnë rreth 230 kilometra rrugë nga Podujeva në Prizren dhe anasjelltas që të pastrohen, ashtu siç e parasheh kontrata ndërmjet komunës së Podujevës dhe kompanisë GEO Group Ing e cila është nënshkruar më fillim të muajit maj.
Sipas raportimeve, ky tender që peshon mbi 9 mijë euro e ka fituar kompania GEO Group Ing me bazë qytetin jugor të vendit (Prizren).
Komuna e Podujevës ka reaguar pas këtij lajmi, duke sqaruar tutje këtë çështje.
Në reagimin e saj, komuna e Podujevës thotë se lajmi i Gazetës Insajderi se “Prokurimi i Bulliqit i jep tender kompanisë nga Prizreni për pastrimin e veturave zyrtare të komunës së Podujevës”, është tendencioz dhe me shumë të pavërteta.
“Kur është bërë lajmi se operatori ekonomik për larjen e automjeteve zyrtare të Komunës së Podujevës ka bazën e saj në Prizren, është anashkaluar qëllimshëm një fakt shumë i rëndësishëm – marrja në shfrytëzim të “Auto Larje Rremi” në Podujevë nga fituesi i kontratës për të ofruar shërbimin”, thuhet në reagim.
Mirëpo, gazeta Nacionale ka siguarua disa informacione shtesë, ku në një bisedë të gazetarës së Nacionales me shefin e kësaj kompanie të kotraktuar, kuptohet se kompania në fjalë nuk ka fare lokacion, apo më saktë të dhënat e paraqitura në Agjencinë e Regjistrimit të Bizneseve, nuk përkojnë me realitetin.
Pyetjet e vazhdueshme të gazetarës, nevrikosin pronarine e kësaj kompanie, Jetmir Mustafa, i cili më pas fyen, dhe mohon të dhënat publike, duke thënë se ka 6 puntorë.
Gazetarja: I nderuar erdhëm në Prizren në lokacionin e kompanisë, deshtëm me ditë ku është kompania në fjalë:
Pronari: Çka po të intereson?
Gazetarja: Për me pa se a i plotëson kushtet e punës?
Pronari: Cilat kushte, çfarë kushtesh paska aty sipas ligjit?
Biseda vazhdon duke mos pasur ndonjë përgjigje konkrete nga pronari.
Ndërkaq, gazetarja e pyet edhe për numrin e punëtorëve, meqenë se në ARBK kjo kompani ndër të tjerash ka vetëm dy puntorë, por pronari i përgjigjet se do të mund ta kryente punën edhe me vetëm një puntor, por më pas thotë se ka 6 puntorë.
Në këtë rast komuna e Podujevës ka publikuar edhe marrëveshjen me qira që ka nënshkruar OE me “Auto Larje Rremi”, e që nënkuptohet se veturat do të pastrohen në Podujevë dhe jo siç ka shkruar “Insajderi” në Prizren.
Ndërkaq, autolarja ”Remi” ku do të pastrohen veturat zyrtare, është e nënkontraktuar nga kompania në fjalë ”GeoGroup”. Ky kontraktim kishte ndodhur një muaj para dhënies së tenderti nga Komuna.
