Ministria e Punëve të Brendshme tashmë ka konfirmuar se tri pika kufitare ndërmjet Kosovës dhe Serbisë janë të bllokuara.
Fjala është për pikat kufitare në Bërnjak Jarinje dhe Merdare, transmeton Paparaci.
Sipas përditësimit të fundit në ueb-faqen e MPB-së, bëhet e ditur se këto tri pika kufitare janë të bllokuara.
Ministria e Punëve të Jashtme dhe Diasporës e Kosovës, njoftoi sonte se është pamundësuar lëvizja e autobusëve dhe kamionëve nga Kosova për në Serbi, në pikë-kalimet Jarinjë dhe Merdare.
Bllokadat besohet se janë shkaktuar si pasojë e protestave që janë duke u mbajtur në territorin serb. Sipas MPJD-së, as kalimi i veturave nuk është i sigurt.
E shefi i stafit të kabinetit të MPJD-së, Sharr Jakupi, ka rekomanduar që të gjitha ata që tashmë kanë hyrë në Serbi, të përdorin pikat kufitare ne Mutivodë, Dheu i Bardhë ose të marrin rrugë përmes Maqedonisë së Veriut (pikë-kalimi kufitar i Preshevës) përmes Shkupit.
Përndryshe, Qeveria e Kosovës mori vendim më 14 qershor që t’i shtrëngojë kontrollet kufitare me Serbinë. Ky vendim qe marrë pas arrestimit të tre policëve kufitarë të Kosovës nga autoritetet e Serbisë.
Autoritetet e Kosovës kanë thënë se bëhet fjalë për rrëmbimin e tyre në territorin e Kosovës, ndërsa Beogradi zyrtare deklaroi se ata janë arrestuar në territorin serb.
