ADVERTISEMENT
Nën patronatin e kryetarit të Komunës së Podujevës, Shpejtim Bulliqi, 19 Qershori-Dita e Çlirimit të Podujevës u shënua me aktivitete të shumta.
Aktivitetet për shënimin e kësaj dite dje kanë vazhduar me mbajtjen e seancës solemne në Kuvendin Komunal, ku kryetari i komunës, Shpejtim Bulliqi dhe kryesuesi i kuvendit, Hilmi Hoxha, mbajtën fjalë rasti, e ku morën pjesë nënkryetarja Lahu, drejtorë dhe asamblistë komunal, komandantë të ZOLL-it, përfaqësues të shoqatave të dala nga lufta e UÇK-së, familje të dëshmorëve, deputetë dhe mysafirë të ndryshëm.
Pas seancës të pranishmit vazhduan të bëjnë homazhe pranë shtataroreve të dëshmorëve në sheshin “Katër Dëshmorët”, tek busti i “Ali Ajetit” dhe në “Kompleksin Memorial të dëshmorëve në Penuhë”.
Gjatë ditës së djeshme u bë edhe inagurimi i punimeve për masat e efiçiente të energjisë në shkollën SH.F.M.U Enver Maloku, ku mori pjesë kryetari Bulliqi, ministrja e Ekonomiksë, Artane Rizvanolli, drejtori i Fondit të Kosovës për Efiçiencë të Energjisë, Ahmet Ismaili, përfaqësues nga Banka Botërore dhe BE-ja, investim ky rreth 330 mijë euro në këtë shkollë, kurse totali i projekteve të realizuar ne 4 shkolla dhe në ndriçimin e rrugës Hakif Zejnullahu kap vlerën e 730 mijë eurove.
Ndërsa, në fshatin e Dumosh u bë vënia e gurthemelit të shkollës “Musli Dumoshi”, ku mori pjesë kryeministri i Kosovës, Albin Kurti, kryetari Bulliqi, anëtarë të ekezkutivit dhe mësimdhënës. Gjithashtu u bë vënia e gurthemelit edhe për ndërtimin e çerdhes së re publike në rrugën Bedri Bajrami në qytet.
Në kuadër të aktiviteteve të shumta të 24 vjetorit të Çlirimit të Podujevës, u mbajtën edhe Manifestim kulturor në teatrin “Avdush Hasani”, një program i pasur kulturo-artistik, në të cilën mori pjesë drejtori i Kulturës, Rinisë dhe Sportit, Pajtim Balaj, përfaqësues të shoqatave të dala nga lufta e UÇK-Së, Shoqëria Folklorike “Flaka e Llapit” dhe shkolla e Muzikës “Mirela”.
Për nder të Ditës së Çlirimit të Podujevës, u hap edhe ekspozita peronale “Njëzet e katër” nga autorja Rifadie Bllaca në Galerinë e Arteve në Podujevë, ku morën pjesë kryetari Bulliqi dhe drejtori Balaj të cilët vlerësuan lartë krijimtarinë artistike të autores.
Aktivitetet u përmbyllën me finale e turneut në futboll të vogël, tek Palestra Sportive “Hakif Zejnullahu”, që ka filluar javë më parë dhe u mbyll në ditën e çlirimit të Komunës së Podujevës.
