Kryeministri i Kosovës, Albin Kurti, i ka përkujtuar 8 mijë e 372 viktimat që u vranë mizorisht nga forcat kriminale serbe, në Srebrenicë.
Kurti tha se Serbia në vend se ta nderoj të vërtetën e viktimave e mohon atë.
“Dita e Përkujtimit të Gjenocidit të Srebrenicës mban në vetvete shumë tragjedi të patregueshme –ditë kur kujtojmë vrasjen e 8,372 njerëzve të pafajshëm dhe krimet e panumërta të përdhunimeve dhe torturave. Është gjithashtu përkujtim se e vërteta e tyre nuk nderohet por mohohet nga Serbia, një krim çnjerëzor në vetvete”, ka thënë ai.
Bosnja e Hercegovina sot shënon 28-vjetorin e masakrës së Srebrenicës. Kjo masakër është më e rënda në Evropë që nga Lufta e Dytë Botërore.
Në mars të vitit 2016, Karadzic u dënua për gjenocid në Srebrenicë. Ai u shpall fajtor gjithashtu për krime lufte, krime kundër njerëzimit gjatë 44 muajve të rrethimit të Sarajevës, dhe për drejtimin e një fushate spastrimi etnik, duke dëbuar kroatët dhe myslimanët nga zonat e Bosnjes për të cilat pretendonin se ishin serbe. Në mars të vitit 2019, gjyqtarët e apelit mbështetën dënimin e Karagjiq për masakrën e Srebrenicës ku u vranë 8 mijë burra e djem myslimanë dhe vendosën që dënimi me 40 vite heqje lirie ishte shumë i lehtë për një krim të këtij kalibri, dhe e dënuan Karagjiq me burgim të përjetshëm, duke i dhënë fund njërit prej proceseve më të rëndësishëm për gjenocide gjatë luftërave ballkanike në vitet 90.
