Njësitë Speciale të Kosovës të stacionuara pranë objekteve komunale në komunat veriore të Kosovës kanë filluar të tërhiqen sipas marrëveshjes së Bratisllavës për deeskalimin e situatës në veri të Kosovës.
Këtë për Paparaci.com e ka konfirmuar edhe zëdhënësi i Policisë së Kosovës, Veton Elshani. Ai në një prononcim me shkrim për mediumin ka thënë se kanë pranuar vendimin e Qeverisë dhe i njëjti është dërguar në terren për ekzekutim.
“Pas pranimit të vendimit të Qeverisë nga ana e Menaxhmentit të Policisë, i njëjti është dërguar në terren për ekzekutim. Vendimi i Qeverisë ka filluar të implementohet”, tha Elshani për Paparaci.com.
Njësitë Speciale të Kosovës kanë shkuar në veri të Kosovës më datë 29 maj kur, kryetarët e komunave veriore të Kosovës, të zgjedhur në zgjedhjet e Prillit vendosën të shkonin në objektet komunale për të marrë detyrat.
