Çdo ditë në vendin tonë raportohen dhjetëra raste të dhunës në familje, ku viktima janë zakonisht gratë që përjetojnë dhunë psikike e fizike nga familjarët e tyre. Por nuk janë të rralla edhe rastet kur nga dhuna pësojnë edhe nuset të cilat kanë probleme me vjehrra.
Një rast i tillë ka ndodhur në një familje në rrugën ‘Mit’hat Frashëri’ në Gjakovë, ku një grua dyshohet se ka ushtruar dhunë ndaj bashkëshortes së djalit të saj.
Brenda Prokurorisë kanë bërë me dije se 24-vjeçarja ka marrë ndihmë mjekësore shkaku i lëndimeve të marra si pasojë e sulmit fizik dhe ka denoncuar rastin në Polici, ku ka rrëfyer në detaje gjithë ngjarjen.
Si rezultat i denoncimit, njësitë policore kanë shoqëruar në stacion policor të dyshuarën, e cila është intervistuar lidhur me rastin. Po ashtu në kuadër të veprimeve hetimore është marrë edhe dëshmia e bashkëshortit të viktimës.
Me urdhër të prokurorit, 41-vjeçarja do të hetohet në liri për veprën penale ‘Dhunë në familje’, ndërsa viktima ka shkuar të jetojë në shtëpinë e prindërve të saj.
