Luan Dalipi, shefi i kabinetit të kryeministrit të Kosovës, Albin Kurti, ka thënë se normalizimi i marrëdhënieve mes Prishtinës dhe Beogradit po përballet me pengesa për shkak të refuzimit të Serbisë për të nënshkruar dhe pajtuar me zbatimin e marrëveshjes.
Kurti dhe presidenti serb Aleksandar Vuçiq u takuan të enjten në Bruksel, takim që në fund nuk pati ndonjë rezultat. BE-ja ka thënë se Vuçiqi e kishte pranuar propozimin e tyre të kompromisit, por jo edhe Kurti. Kryeministri i Kosovës pas takimit ka thënë se qëndrimi i Serbisë është bërë qëndrim i BE-së. Akuza për njëanshmëri të BE-së ka pasur edhe nga akterë të tjerë të Lëvizjes Vetëvendosje, partia në pushtet që udhëhiqet nga Kurti.
Dalipi ndër të tjera në Twitter ka shkruar se përkushtimi i Kosovës për stabilitet në Ballkanin Perëndimor mbetet i fortë.
“Përkushtimi i Kosovës për stabilitet në Ballkanin Perëndimor mbetet i fortë. Traktati i BE-së për normalizimin e marrëdhënieve Kosovë-Serbi po përballet me pengesa për shkak të refuzimit të Serbisë për të nënshkruar dhe pajtuar për zbatimin e plotë të marrëveshjes”, ka shkruar ai.
Sipas Dalipit, Vuçiqi po tallet me të gjithë të përfshirët në proces, duke përmendur faktin se si presidenti serb ironizoi duke thënë se nuk e kishte nënshkruar marrëveshjen pasi e lëndoni dorën.
“Serbia refuzoi në mënyrë të përsëritur të nënshkruajë marrëveshjen, duke përmendur arsye të ndryshme, duke përfshirë lëndimin e supozuar të dorës nga presidenti i Serbisë. Ai po tallet me të gjithë të përfshirët! Pavarësisht këtyre sfidave, Këshilli Evropian miratoi konkluzionet më 23 mars, duke përshëndetur marrëveshjen. Serbia më vonë e shkeli marrëveshjen duke votuar kundër anëtarësimit të Kosovës në Këshillin e Evropës”, ka shkruar tutje ai.
Shefi i kabinetit të Kurtit ka theksuar se Kosova me të drejtë po e kërkon një plan të balancuar të sekuencimit për zbatimin e marrëveshjes.
“Kosova me të drejtë kërkon një plan të balancuar të sekuencimit për zbatimin e marrëveshjes, ndërsa Serbia e rrezikon vlefshmërinë e marrëveshjes duke insistuar në Asociacionin si parakusht”, ka shkruar ai.
