Siguria publike në Kosovë konsiderohet se po cenohet nga krime të natyrave të ndryshme, sidomos nga vjedhjet e grabitjet, fenomen ky mjaft shqetësues, që po shkakton humbje e pasiguri nëpër banesa, shtëpi, institucione financiare, vetura e dyqane. Rastet e vjedhjeve janë nga më të ndryshmet dhe jo çdo herë Policia arrin t’i kap të dyshuarit, raporton Sinjali.
Por ndryshe ka ndodhur me një rast që u raportua dje në fshatin Torinë të Lipjanit, ku Policia ka arritur ta kap në flagrancë një person që kreu vjedhje në një hekurishte.
Siç mëson Sinjali nga burimet brenda Prokurorisë, i dyshuari F.B., është prangosur pasi dyshohet se ka vjedhur metale të ndryshme, por edhe mjete të tjera nga një hekurishte dhe ka tentuar që të largohet pa u vërejtur.
Pasi nuk arriti të shpëtojë nga prangat e Policisë, i njëjti është arrestuar dhe shoqëruar në stacion policor, ku ka dhënë deklaratën e tij lidhur me rastin.
Ndaj tij, Prokurori i Shtetit ka urdhëruar masën e ndalimit policor dhe inicimin e rastit për veprën penale “Vjedhje”.
