Kryeshefi i KRU “Gjakova”, Hasan Krasniqi, është arrestuar në Bullgari, në bazë të një urdhër-arresti ndërkombëtar të lëshuar nga Policia italiane për dyshimet për trafikimin me qenie njerëzore, raporton me burime gazeta online Reporteri.net.
Siç raportoi sot gazeta online Reporteri.net, arrestimi i Krasniqit ka ndodhur qysh më 19 shkurt të këtij viti. Ai u kap nga autoritetet bullgare me t’u futur në Bullgari, në pikën kufitare në Gueshevë, derisa me familje po udhëtonte për pushime përmes kufirit me Maqedoninë e Veriut.
Urdhërarresti ndërkombëtar ndaj tij është lëshuar në qytetin e Barit, në Itali, një muaj më parë, përkatësisht më datë 16 janar 2024.
Kryeshefi i KRU “Gjakova” dyshohet për tri vepra penale “lehtësimi i migrimit ilegal me bashkëpunim”, “përdorimi i dokumenteve false” dhe “falsifikimi i dokumenteve zyrtare nga një person privat”, merr vesh gazeta online Reporteri.net.
Atij, me kërkesë të Prokurorisë së Qarkut Kyustendil në Bullgari, një Gjykatë e Qarkut bullgare, më 22 shkurt 2024, i ka caktuar masën e paraburgimit, deri në vendosjen rreth kërkesës së autoriteteve italiane për ekstradimin e tij në Itali, raporton gazeta online Reporteri.net.
KRU “Gjakova”: Kryeshefi Krasniqi është në pushim vjetor
Për “zhdukjen” e kryeshefit tash e disa ditë, që rezulton i arrestuar në Bullgari, nga KRU “Gjakova” kanë thënë se i njëjti është në pushim vjetor.
“Kryeshefi është t’u e shfrytëzu pushimin vjetor. Nuk kam informacion më shumë për këtë çështje. Është duke u shfrytëzu pushimin vjetor, nuk ka pse me u lajmëru. Nuk kam informacion zyrtar. Ka nja 5-6 ditë.”, ka thënë Syla-Dina për Express.
