Gjykata Kushtetuese e Kosovës njoftoi të hënën nëpërmjet një komunikate për shtyp se aktgjykimi i Gjykatës Supreme të Kosovës (9 mars 2023) që konstatoi se konsumatorët kosovarë mund të kërkojnë të kompensohen për rrymën e paguar për konsumatorët serbë në pjesën veriore të vendit është në përputhje me dispozitat e kontestuara të Kushtetutës të Kosovës.
Gjykata e Apelit, në vitin 2017, konstatoi se është e jashtëligjshme praktika që qytetarët e viseve të tjera të Kosovës të paguajnë për rrymën e shpenzuar në katër komunat në veri të Kosovës të banuara me shumicë serbe – Mitrovicë e Veriut, Zveçan, Leposaviq dhe Zubin Potok – dhe sëkëndejmi, përgjegjësia e pagesës për rrymën e shpenzuar i kaloi Qeverisë së Kosovës.
Gjykata Themelore në Prishtinë, më 11 tetor 2021, detyroi Zyrën e Rregullatorit të Energjisë Elektrike (ZRRE) që të obligojë kompaninë kosovare për Distribuimin e Energjisë Elektrike (KEDS) për kompensimin e mbi 40 milionë eurove për kosovarët, të cilët në periudhën nga 2012-2017 ua paguan rrymën konsumatorëve në katër komunat veriore me shumicë serbe./Albanian Post
