Anëtari i kryesisë së LDK-së, Visar Azemi, ka reaguar pasi Prokuroria Speciale e Kosovës ka thirrur për intervistim ministren e Industrisë, Ndërmarrësisë dhe Tregtisë të Kosovës (MINT), Rozeta Hajdari, e cila dyshohet për keqpërdorimin e detyrës zyrtare në lidhje me rezervat shtetërore.
Azemi ka thënë se të korruptuarit “e kanë vendin në burg, e jo në institucione”, teksa ka shkruar për Hajdarin.
“Para disa ditëve miku e kolegu i Albin Kurtit, njëherit ambasador i Kosovës në Kroaci, Martin Berishaj, u intervistua për disa orë në Prokurorinë Speciale të Kosovës. Kjo për dyshimet për aferën milionëshe me energjinë elektrike. Sot, është Ministrja e Industrisë, Ndërmarrësisë dhe Tregtisë, Rozeta Hajdari, që është intervistuar për orë të tëra në Prokurorinë Speciale të Republikës së Kosovës”.
Ajo gënjeu duke mohuar intervistimin, por Prokuroria e demantoi duke konfirmuar se ministrja u intervistua në cilësinë e të pandehurës, nën dyshimin se e ka kryer veprën penale “Keqpërdorim i pozitës apo autoritetit zyrtar. Prokuroria Speciale njoftoi gjithashtu se Hajdari u mbrojt në heshtje. Dhe është pikërisht kjo forma se si po vepron kjo qeveri në raport me keqpërdorimet dhe korrupsionin. Aferat po i dalin sheshit, e këta po heshtin. Por, kjo s’do të lejohet. Keqpërdoruesit e të korruptuarit vendin kanë në burg e jo në institucione”, ka shkruar Azemi në Facebook.
