Për shkak të punimeve në magjistralen Prishtinë-Podujevë, sot janë krijuar kolona të gjata të automjeteve prej fshatit Besi deri në Lupç.
Vitin e kaluar është hapur tenderi për ndërtimin e rrugës Prishtinë-Podujevë, në vlerë 38 milionë euro.
Zëvendësministri i Infrastrukturës, Hysen Durmishi, ka thënë se punimet pritet të përfundojnë gjatë këtij viti.
Ndërkohë, po vetë ministri Durmishi ka njoftuar se është ftuar për intervistim nga Prokuroria Speciale për tenderin e rrugës Prishtinë-Podujevë, më datën 8 maj.
Këtë ftesë, Durmishi në një postim në Facebook e ka cilësuar të bazuar në disa spekulime, pasi sipas tij, “me gjasë dikujt po i pengon dinamika e punimeve në këtë projekt”.
“Unë më datë 8 maj do të shkoj në Prokurori Speciale për të ju treguar që jam i lumtur që jam nënshkrues i kontratave për rrugën Prishtinë – Podujevë. Do të doja që edhe projektet tjera të ecnin me dinamikën e punëve që po bëhen në këtë rrugë. Do të vazhdoj që ta kryej punën time me nder e përkushtim pavarësisht pengesave që na dalin gjatë rrugës”, ka shkruar ai.
Punimet për zgjerimin e rrugës Prishtinë-Podujevë, të cilat nisën para më shumë se tetë vjetësh, ende nuk kanë përfunduar, ndërsa pretendimet ishin që kjo rrugë të kryhet brenda tri vjetëve.
